0 طريقة الرز بلبن زى المطاعم واحلى

السلام عليكم ورحمة الله وبركاتة

وصفة النهاردة بقى رز بلبن بطريقتي . بس جميل وبسيط وفيه كذا تكة تخليه يطلع معاكي ناعم وجميل حتى وهو بارد كل مرة وأروع من بتاع بره 100مرة, حتى ماماتي اعتمدة طريقتي دي من زمان .

بإسم الله نبدا:-

ده شكل قوام الرز بلبن





وكدة لما زينا الأطباق بالجوز الهند والزبيب





المقادير دي تعملك 4 كاسات





المقادير:-

ملو ايدك كدة رز مصر او ربع كوباية





ده شكل المقادير كلها مع بعض (صورة عائلية يعني)
الكوب المستخدم في القياس هو كوباية الماية العادية
2 كوباية لبن طازج
ربع كوباية رز
نص كوباية كريمة لباني
2 معلقة سكر كبار
1 معلقة طعام مليانة نشا ذرة
وفانيليا للنكهة




يا جماعة كتير جدا جدا بيسألوني عن الكريما اللباني بالذات بعد موضوع المهلبية . كريمة الخفق او الكريما اللباني او الduble cream أوالfresh cream هي نفسها الكريم شانتية بس قبل الخفق. وفي نوعين نوع مخصص للحلويات ونوع مخصص للطبخ ممكن تستخدمي أي وحدة فيهم , بس لازم تعرفي اني الي بتبقى مخصصة للحلويات أوقات بتبقى مسكرة يعني مضاف لها سكر بس مش متوفرة كتير بالذات في مصر والي مخصصة للطبخ بتبقى من غير سكر . ممكن تستخدمي اي وحدة فيهم عادي.

 ده شكل كريمة خفق المراعي الي متوفرة في كل دول الخليج . دي زي ما موضح عليها للحلويات بس النوع الي مخصص للطبخ برضو ممكن تستخدمي في الحلويات لانو كريما لباني من غير سكر.وميزة اضافة الكريما للرز بلبن والمهلبية والعاشوراء بيديها نكهة جميلة جدا جدا ومش بيخليها تعمل وش حتى لما تبات في الثلاجة والميزة الأهم انها بتربط نكهة الرز بنكهة اللبن وبتدي تجانس جميل علماً





مش عارفة ليه مقتنعة اني اللرز باللبن ما يتزينش غير بالجوز الهند والزبيب يمكن علشان ما ساعات ما فتحت عنيا وأنا بلقي ماماتي بتزينه بالجوز الهند والزبيب .





الطريقة:
كتير بيشتكون اني الرز بياخذ وقت طويل عقبال مايستوي يعني بنسيب اللبن بيغلي لفترة لحد ما الرز يستوي .
بصي بقى حنعمل اية . حنجيب كاسارول وحنحط فيها (اللبن والكريما اللباني)





الرز المغسول




ونضيف السكر




كدة عندنا في الكاسرول(اللبن والكريما والسكر والرز)





حنرفعها على النار لحد ما تغلي غلوة واحدة بس او تسخن جداً ونطفي عليها ونسيبها لحوالي ساعة . والسبب اننا بنخلي الرز يستوي براحتة من أثر الحرارة وحيبقى بعد كدة كريمي جداً وبيدوب لوحدة بس محافظ على شكلة وحجمه . 

والأهم انك لما تيجي تاكلي الرز بلبن تحسي اني الرز كان منقوع في لبن مش في مية وطعمه فعلا طعم اللبن ومن هنا بتيجي نكهة (طبق الرز بلبن). على فكرة كلت رز بلبن عند ناس كتير وأغلبهم يا بيغلو الرز في مية وبعد كدة يضيفو على اللبن فللأسف بتحسي انك بتاكل رز مفلفل ومضاف له مهلبية أو بينقعو الرز في المية لفترة طويلة. علشان كدة بتحسي لما بتاكلي رز بلبن من بتوع المحلات اني الرز مندمج جداً والطعم متكامل كدة





ده شكل الرز اول ما غلي اللبن وقفلت عليه





وده شكله بعد ساعة بالظبط بصي بقى طري والحبة طولت جداً وجاهز اننا نعمله رز بلبن , وعلى فكرة لو دقتيه حتحسية متشبع بنكهة اللبن والكريما

بعد ما كدة حنولع النار على الرز بلبن تاني ونسيبها تغلي كدة حوال ربع ساعة مع التقليب المستمر وحنلاحظ اني الرز استوى نهائي وبقي طري وجميل.

وهنا شكلة بعد ما استوى 100% بصي ناعم ازاي بس محافظ على شكله لسه

حنذوب معلقة النشا في مية عادية

وحنضيفها على الرز بلبن مع التحريك المستمر بالمعلقة الخشب

وده بقى شكلة . نيجي بقى لمواصفات الرز بلبن الصحيح . حيبقى قوامة شبة تقيل بس أقرب للسيولة . والرز متوزع كدة على الوش زي ما خدتي بالك من الصوره دي مش نازل في قعر الكاسرول.

بصي كدة من قريب . واضح جداً اني قوامة شبة سائل بس مش لدرجة الماية

وعلشان توصل الفكرة اكتر بصي بينزل بسهولة ازاي . ليه علشان الرز حيفضل ينزل في نشا وحيخليه يمسك أكتر وأكتر واحنا مش عيزينوة يبقى متماسك وناشف .علشان كدة ما تقلقيش وما تحاوليش تضيفي نشا زيادة لاني دي مقادير مدرسوة 100%

بحب أضيف رشة فانيليا بتدية نكهة جميلة قداً قداً قداً

سبته يهدي شوية وصبيته في الكاسات . بصي الرز متوزع ازاي بشكل صحيح في كل الخليط. وبيتصب بسهولة وشبة كثيف بس مش تقيل.

بصي على الجمال

أخواتي أخدو كوبايتين علشان مش بيحبو عليه اي مكسرات .

والكوبايتين دول زينتهم بجوز الهند والزبيب

أسيبكم مع الصورة النهائية لكاسات الرز بلبن بعد التزين

بصي جميل ازاي من قريب

وهنا سبتها لما بردت خالص وده بيبقى قوامها . ناعمة وزي الزبدة وطعمها ما أقولكيش بقى.

لو حبيتي الرز بلبن بتاعك يبقى جميل الشكل الده التزمي بالمقادير الدقيق والتكات وصدقي مش حتغير الطريقة دي لو جربتيها لانها خلاصة خبرة بحطها بين إديكي.

كدة تمام الموضوع خلص للأسف القعدة الجميلة معاكم دايما بتخلص بسرعة بس أكيد لينا لقاء تاني مع وصفة جديدة من مطبخي . بتمنى موضوعي البسيط يكون عجبكم وما تنسوش أختكم لطيفة من صالح دعواتكم الجميلة.

منقول من فتكات

تابع القراءة

0 بطاطس مقرمشه زى البانيه

بطاطس مقرمشه زى البانيه
من مطبخ Kenzie Wael
ستات بيوت قدها وقدود
 
 

غسلت البطاطس الاول وقطعتها حلقات بالشكل دة وقطعتها بقشرها على فكرة لانى انا غسلتها الاول قبل ما اقطعها يعنى متخافيش من القشرة لما تسلقيها هتقشرى القشرة دى بعد كدة
 

وبعد ما قطعتها غسلتها علشان النشا اللى فيها وحطتها على النار وحطيت عليها ميه علشان تتسلق

 
حطيت عليها شويه ملح

 
وحطيت عليها شويه كمون





دى بعد ما سلقتها قشرتها وسبتها تصفى الميه برحتها




اول حاجة باخد البطاطس واحطها فى الدقيق وحاطه شويه ملح وكمون وفلفل اسود على الدقيق لا يذكر يعنى علشان يدى طعم برضو ولو مش عاوزة خلاص مش مشكله





وبعد كدة بغمرها فى البيض وطبعا حاطه شويه ملح وكمون وفلفل اسود على البيض



بعد كدة حطتها فى البقسماط وضيفي للبقسماط حبة نشا وبيكنج بودر




وطبعا هتكونى مسخنه الزيت وتبدئى تحمرى البطاطس بتبقى مقرمشه وجميله



دى اول حاجة طلعتها من الزيت لونها حلو ومقرمشه والاطفال هيحبوها كتير كتير والكبار كمان وبحطها على مناديل علشان نصفى الزيت منها

تابع القراءة

0 مش عارفة تعملى كيكة..تعالى اعلمك كيكة سهلة وناجحة

بسم الله
المقادير

3 بيضات حمرا كبار

3 كوب دقيق

كوب ونص سكر
كوب زيت أو زبده(بس الزيت بيخليها خفيفه اوى)
كوب لبن
ورقه بيكنج بودر
ورقتين فانيليا
معلقتين كاكاو خام(بنشيل مكانهم معلقتين دقيق)

الطريقه

فى الخلاط تحطى ال3 بيضات مع الفانيليا وتضربى كويس اوى لحد لما المقدار يتضاعف
وبعدين تحطى السكر على 3 دفعات وتضربى كويس اوى بين كل مره والتانيه
بعد كده تحطى اللبن وتضربى كويس
وبعدين تضيفى الزيت وعلى فكره انا بستخدم زيت التموين وبصراحه مفيش فرق فى الطعم بينه وبين كريستال
وتضربيهم كويس اوى يعنى حوالى 10 دقايق كده وبعدين تصبى الخليط فى طبق عميق
وتكونى نخلتى الدقيق مع البيكنج بودر والكاكاو
هنا بقى تروحى تشغلى الفرن على 180 درجه
وتبدأى تحطى الدقيق شويه بشويه لحد لما تخلصى الكميه(أنا بحب اشتغل بايديا علشان لو فيه اى تجمعات دقيق افككها)
احط الدقيق بايدى الشمال واخلط باليمين بالراحه على شكل دايره وبعدين نص دايره وفى نفس الاتجاه
تجيبى بقى الصينيه المدهونه زيت ومبطنه دقيق وتصبى الخليط والكيكه دى بتاخد فى الفرن من 45 ل60 دقيقه
ودى بقى الصور

[اول حاجه تعمليها تبطنى الصينيه بالزيت والدقيق

تضربى البيض والفانيليا كويس

تضيقى السكر على 3 دفعات

تضيفى اللبن بس انا نسيت اصوره وبعدين تضيفى الزيت

تضربى الخليط كله حوالى 10 دقايق

ده الخليط والدقيق جاهزين تروحى بقى تشغلى الفرن على 180 درجه

هنا بدأت اضيف الدقيق شويه شويه

بدأت اخلط الدقيق وألف بايدى دايره كامله وبعدين نص دايره

بعد ما الخليط امتزج كويس

الصينيه كده تمام على الفرن عدل

وهنا بعد خروجها بالسلامه
وبصراحه طلعت فى دماغى انى ازوقها واعملها تورته وكان عندى كريم شانتيه وكنت عايزه اجرب موس النسكافيه
و سبتها تبرد خاااااااااااااالص وبعدين قسمتها على 4

وحشيتها وزوقتها بموس النسكافيه وكانت دى النتيجه

كمان صوره من جوه

وده شجعنى انى اعمل تورته عيد ميلاد بنتى جومانا بيها ودى النتيجه

ودى عملتها بصوص الشوكولا
ودى حشيتها كريم شانيه ساده

وهنا بعد ما عملت 3 طبقات

ولما غلفتها بالكريم شانتيه

وبعدين صبيت صوص الشوكولا وزينتها بالكريز ووردات الشوكولا البيضا

 جومانا النونو

فتكات

تابع القراءة