0 الحوواشي المصري بالصور من مطبخى

طريقة الحوواشي المصري بالصور من مطبخى

الحواوشي بالصور و الخطوات من زينب زياد
مقادير عجينه العيش :-
انا عملت كيلو دقيق سبت منه شوية صغيرين بس علشان افرد بيهم العجين
وم3 ملاعق خميره - معلقه ملح كبيرة - معلقه سكر صغيرة
وتعجبن بالماء انا استخدمت 2 كوب ماء كبير

 
هنا بعد ما عجنتها كويس جدا جدا بايدى
وبعدين رشيتها بالدقيق

 
هنا غطيتها بفوطة ودخلتها فى غرفه درجه حراراتها دافيه وعليها كمان بطانيه

 
هنا كانت المفاجئة ماشاااااء الله بجد خمرت جدا

 
هنا حضرت 3/4 كيلو لحم مفروم ناعم

 
بصلتين كبار ومعاهم فلفلايه خضرة كبيرة

 
هنا اللحمه وعليها الفلفل الاخضر والبصل المفروم وبشرة شوية ليه ( دهن الخروف )

 
حطيت البهارات ملح - فلفل - بهارات لحمه - زعتر اردنى وعجنتها كويس فى ايدى

 
ادى شكلها

 
هنا قطعت العجين كور وسبتها وغطيتها تانى بالفوطة شوفوا الصورة اللى بعد دى هتلاقو الكور خمرت تانى ماشاء الله

 
ادى شكل الكور قبل ما شتغل بيها على طول خمرانه اوى وهشه جدا جدا وفلفل حار لجوزى طبعا مش انا و طماطم مقطعه هحطها اثناء الحشو
انا لاافضل انى احطها فى اللحمه لانها هتعمل مايه فيها

 
بفرد الرغيف بالشكل ده بالدقيق طبعا

 
وبعدين بحط الحشو بتاعى ومعاه الطماطم والفلفل الحار ( اللى حسب الرغبه طبعا )

 
صنيتى بمسحها بمنديل مطبخ فيه زيت

 
وده اللى حطيته فى الصينيه عملته فى الفرن على درجة حرارة عاليه والفرن حامى

 
فى جزء عملته ع الجريل واستوى بققا جميل جدا جدا بس تقلبيه كل شوية علشان تتاكدى انه بيستوى من كل ناحيه

 
ده قبل ما يدخل فى السوا بتاعه

 
وده شكل الحواوشى اللى كان ع الجريل
الف هنا وشفا

 
هنا الشكل النهائى بتاع الحواوشى اللى فى الفرن
الف هنا وشفا

منقول

 

تابعونا على صفحتنا على الفيس بوك

صفحة ست مصرية

تابع القراءة

0 البيتزا والمعجنات الحلوة بعجينة العشر دقايق بالتفصيل

[quote=ام الوردتين الحلوين;123216773]

اولا العجينه عجينة 10 دقايق بتاعة الشيف لطيف ده بئت عندى قاعده فى كل عجينه ناجحه انا بعملها المقادير
انا عملت المقادير الاى تناسبنى بصو عملت
3 كوب دقيق
كوب ونص ماء دافى
معلقة خميره
نص معلق صغيره بكنج بودر
كيس لبن نيدو الاى بجنيه ده
2م ك سكر
نص م ص ملح
ربع كوب زيت وكله بنفس الكوبايه

طبعا هنقسم الدقيق كوب دقيق مع كل المكونات الالجافه الاى فوق ونحط المايه الدافيه ونسيبه يخمرو ما بين 15 الى 20 دقيقه
بعد كده نحط الكوبين الاى فضلين من الدقيق ولزيت واعجنى اعجنى لحد ما العجينه تبئه طريه ولينه ومفهاش اى خروم تكون ملساء افضلى اعجنى لحد ما توصل للشكل الناعم وسيبها ترتاح شويه وشكلى بئه
وتقطعى كده وتحسى ذى ما انتى عايزه
ده انا حشيتو كفته كانت عندى من اكله تانيه حطيت ما يونيز وصلصه جبنه وكفته وقفلتو زى السندويتش الفينو وطبعا على الوش سمسم او بيض بلبن تمسحى بيهم فى الكفته محطيتش سمسم انما البقى حطيت على وشه سمسم
وده كمان كفته بس اضفاتو مختلفه
بس والبتزا بئه الصلصه انا بحمر تومه قوى واحط عليه عصير طماطم واسبكهم وبعدين افرد العجينه واحط الصلصه واحط البصل ترنشات وزيتون وفلفل وطاطم وفراخ شرايح او سلامى او سوسيس اى حاجه وجبنه رومى وجبنه موتزريلا

ده بالسلامى بس كده وعملت كمان بالشوكلاته النوتلا
بس وده شكلهم
وده كمان

منقول من فتكات

تابع القراءة

1 شوية تكات بسيطة لكن الطعم هيفرق

شوية تكات بسيطة لكن الطعم هيفرق

1-عايزة الملوخية مزبوطة حطى ذرة سكر فيها وحطى فصين توم.مدقوقين نيين غير التقلية ومعاهم كزبرة ناشفة غير اللى فى التقلية

2-عايزة السمك والجمبرى المقلى متقرمش ومتماسك بعد الدقيق قبل التحمير هاتى طبق فيه مية غطسيه فى المية واحدة.واحدة بسرعة وحطى على النار...لالالالا مش هتطرطش خالص لاتقلقو لأن المية بتلزق فى الدقيق وتثبته

3-الكرنب عشان يبقى اطعم حطى فى الشوربة اللى هتتشربه توم مدقوق وكمون ومعلقتين صلصة

4-البامية عشان تبقى احلى حطى التوم على مرحلتين مرحلة مع تشويح البصل والمرحلة التانية مع الطماطم المعصورة وخليها كلها بالطماطم بلاش صلصة صناعية تبقى احلى

5-سلطة الكول سلو او الكرنب حطى مع المايونيز زبادى وسكر طعهمها هيبقى زى المطاعم بس سبيها فى التلاجة الأول كام ساعة فى الخليط

6-البهارات الصحيحة قبل ماتطحنيها شوحيها ع النار طعمها هيبان اكتر

7-البيتزا حطى على اطرافها زبدة وتوم بودرة متسيحين فى المايكرويف كلهم هياكلو الأطراف مش هيسيبوها بس إحشيها بجبنة

8-التومية حطى نشا متدوب فى مية ع النار لما تبقى مهلبية سيبيه يبرد وإضربيه مع فصين توم وخل وبعدين زيت طعمها افضل

9-ماتحطيش لمون خالص بقشره على صوانى السمك او الجمبرى او فى الشوربة فى النار الطعم هيبقى مر ضفيه بعد مايستوى المقصود القشر فقط

10-الكبدة الاسكندرانى حطى عليها طحينة قبل السوا حبة صغيرين
هفتكر حاجات تانية واقولكم عليها جربو التكات دى.

تابع القراءة

0 اطبخى حمام من غير حمام خالص وبالصور من مطبخى

السلام عليكم
النهاردة معايا وصفة حلوة انا شوفتها فى جروب على الفيس
خدت فكرتها ونفذتها بطريقتى فحشو الحمام

ربنا يجزى صاحبتة كل خير
دة صورة تشويقية


يارب تعجبكم
اولا
هنجيب وراك فراخ بعدد الافراد عندك التلاتة بيبقوا كيلو
عشان تعرفى تخلى ويبقى لة منظر كدة هههههههههههه
وهنخليها من العظم بس هنسيب اخر حتة من العظم
بتمشى على العظم بالراحة وتزقى اللحم بالسكينة وبردة بتستخدمى
ايدك
[
صعب قوى التصوير وانا بشتغل ههههههههه
كل شوية اغسل ايدى واصور

هنا بقى بنكسر بالسكينة وتسيى اخر حتة




بنحافظ على الجلد سليم


ونركنة على جنب
العظم ممكن نعمل بية شوربة فاى وقت تانى

ثانيا الحشو(ممكن انتى تحشى باى حاجة تحبيها وممكن بطريقتك انتى زى مبتحشى الحمام عندك)
دى طريقة امى
فحشو الحمام
انا عملت 7 اوراك كوباية ونص رز
وبصلة متوسطة
ومعلقتين زبدة كبار
وملح وفلفل بس


بقطع البصل صغير واغسل الرز وانزلة عليهم
واحط الزبدة والملح والفلف
ونص كوباية مية
واحطهم على النار وافضل اقلب لحد ما يتنشف ويبقى تلت سوى كدة

هنا بعد ماحطيت الرز والمية وبقلب اول مايغلى اهدى النار
وافضل اقلب فية لحد ما يتشوح خالص

هنا بعد ما استوى


واسيبة يهدى حبة

هنفرد الربع فرخة ونحشى حوالى معلقة رز او حسب حجم الورك
وتدخلى الرز كويس فالورك من تحت وتظبطى الشكل
وتلمى بقى وتقفلى بخلة سنان







ممكن بقى تلفية فورق فويل وتسلقية عادى وبعدين تحمرية
بس منغير خلة السنان طبعا

هنجيب بقى كيلو رز وكيلو لبن وكوباية مية حتة زبدة ممكن معلقى قشطة
ملح وفلفل

بنغسل الرز ونحطة فصينية وننزل علية اللبن المغلى وكوب مية وملح فلفل والزبدة ونقلب
باقى الرز اللىفضل من الحشو حطيتة كمان بيدى طعم حلو

ونرص الفراخ نخلى الجزء المقفول لتحت
بعد كدة نحطة على النار ونحط على الوش القشطة


ونحطة على النار لحد ما يغلى
طبعا الفرن بيكون مولع من بدرى
بنرش رشة ملح ورشة فلفل على الوش


وندخلة الفرن
ونغطى بورق فويل اول نص ساعة




دى بعد اول نص ساعة
شيلت الفويل
واسيبها تكمل سوى وتحمر

اية الحلاوة دى




انا عملت سلطة كول سلو
المايونيز انا اللى عملتة فالبيت
وعملت الحلو كاسات الجيلى وبواقى الكيك

وهنا بقى اسيبكم مع الصور اما قدمتة

جوزى اول ماشافها فكرها حمام وبعد كدة اكتشف هههههههههههه
عجبتة اوى

الموضوع للعضوة:مستجابة الدعاء

من فتكات

تابع القراءة

0 كيكة سهلة وجميلة

كيكة من مطبخ Rodi Habeba

 
المقادير

 

 3كوب دقيق
4بيضات
اكوب لبن
كوب اﻻ ربع زيت مع زبده
اكيس بانج بودر مع كيس فانيليا وزره من الملح
و3 معالق كاكاو وكوب ونص سكر 

اهم شئ الكوبية اللى هاتعيرى بيها المقادير تكون واحده

الطريقه

 

 تحطى السكر مع الكوبيه اﻻ ربع زيت مع زبده وتقلبيهم كويس اوى بالمضرب

او بالخلاط

 لحد ما تحس لونها فاتح وبعدين نضيف البيض واحد واحده وبعدين اللبن واخر حاجة الدقيق وعليه البيج بودر وزره الملح

بالنسبه لكاكاو هناخد شويه من الكيك ونضيف عليها الكاكاو وبعدين نضيف فى الصنينه نص مقدار الكيك وبعدين نضيف الشويه اللى عليها الكاكاو وبعدين نضيف النص التانى من الكيك

 

 

تابع القراءة

1 اعملى شكولاتة نوتيلا فى البيت ووفرى

 كلنا عارفين شوكولاتة نوتيلا اللى بتتعمل ساندوتشات دى وكتييير من الاولاد بيحبوها جدا وبياكلوها بس ياعينى البرطمان بالشئ الفلانى وبيخلص فى ساندوتشين عشان كدة انا جبتلكوا انهاردة طريقة عمل شوكولاتة النوتيلا عشان تعمليها فى البيت لاولادك ومتحرمهيمش من حاجة ابدا المقادير كوباية كاكاو خااااااام خلى بالك انا قولت خاااااام
كوباية سكر بودرة
كوباية لبن
كوباية الاربع زيت ذرة او عباد الشمس اوعى تحطى زيت تموين
كدة تماااام كل المقادير دى تحطيها فى خلاطك الجميل وتضربيها ضربا مبرحا حتى تستغيث
قصدى لحد ماتتخلط كويس اوى ودة شكلها بعد الخلط
شايفين الحلاوة ياولاد ولا اجدعها نوتيلا هاتى بقى برطمان نضيف وناشف وحلو كدة وعبيهاااا
انا كان عندى برطمان من بتاع حلاوة اسبريد اختراع ياكوتش عبيت فية النوتيلا بتاعتى حبيبتى علشان تدينى احساس انى شارياها من برة كمان وكمان حجم البرطمان 350 جرام يعنى الكمية اللى عملناها اكتر من ربع كيلو والمقادير بفضل الله متوفرة عندنا فى البيت ودة الشكل النهائى
تااااااااا تاااااااااا تااااااااااا اية رأيكوا والله وطعمها حكاية وخلى العيال تاكل وتفرح وتتبسط وممكن تضاعفى الكمية وتليها عندك هتنفع فى فطار او فى ساندويتشات للعشاا 

 

منقول من فتكات

تابع القراءة