اتعلمى تجيبي طلباتك من السوق بالصور وخزينها بكل سهولة

انا هقولكم علي طريقتي اللي مريحاني واللي بفضل الله بتوفرلي فلوسي ووقتي ومجهودي

اول حاجه انا اما بروح السوق وانا بشتري لازم افاصل في كل حاجه وبجيب بسعر كويس حتي لو هتوفري
ربع جنيه انتي اولي بيه ثانيا اول مابنزل لازم ادي لاي حد ياقبلني غلبان حاجه لله بنيه ان ربنا يباركلي في اللي هشتريه ويوقعني في ولاد الحلال هههههه
نقي الحاجه بنفسك متخليش البايعين يحوطولك بمزاجهم لانهم هيحوطو حاجات بايظه ومركونه عندهم يااما هتنقيلك الطمطايه المفعصه او البطاطسايه البايظه انا عن نفسي بنزل كل اسبوعين مره بجيب طلبات الاسبوعين وبكون محوشه
في الاسبوعين دول مع مصروف السوق مبلغ صغنن وليكن 20ج او 15ج دول بيكونو من الفكه اللي بتفضل مننا
بجيب بيهم ايه بقي بجيب بيهم الخزين اللي بيتحط في الفريزر يعني مثلا لو هجيب للاسبوعين 2ك بطاطس بجيب من الفلوس دي كبلوكمان تخزين ولو هجيب كيلو بسله بجيب نص كيلوا كمان من الفلوس دي للتخزين
الهدف من الموضوع ده اني بخزن في موسم الحاجه وكمان وهي طازه ومن غير مااحس بدل ماتستني لاخر الموسم وتيجي تشتري ميكونش معاكي فلوس ولا كمان تلاقي الحاجه يعني بتكون ساعات البسله في الاواخر كده بتفضي
ومثلا المانجه تكون خلصت متلحقيش تخزينها دي الفكره يابنات

المهم بشتري الطلبات وارجع البيت اعمل الاتي
اطلع الطلبات كلها من الاكياس افضيها في اطباق بلاستيك كبيره وافرش المفرش بتاع السجاد
ده واقعد بقي قدام التلفزيون انضف كل حاجه
نيجي مثلا للبطاطس انا مثلا جيبت 2 كيلو للاستعمال وكيلو للخزين
بقشرها كلها واغسلها واقطعها علي حسب الاستعمال سواء صوابع للتحمير او دواير

للصنيه علي حسب استخدامك يعني زي كده

وبعدين اجيب حله كبيره فيها مايه ونقطتين خل احط البطاطس تاخد غلوتين




وبعدين اسيبها تبرد واعبيها في اكياس وعلي الفريزر
بتاعه الاستخدام بسيبها في فريزر التلاجه وبتاعه الخزين بحطها في الديب فريزر
والله يابنات مريحه جدا وكمان بتيجي وقت الاستخدام بتكوني فاضيه يادوب تطلعي
تطبخي او تحمري في ثواني متقفيش في المطبخ كتير
وكمان ولا البطاطس بتطري ولا ريحتها تغير ولا تبوظ




الكرنب نفس النظام بجيب 2 بجيبها اقطعها واسلقها في مايه وكمون
وبعدين بجيب كل ورقه اشيل العرق اللي في النص والفها كده


وبعدين اقطعها كده 3 حتت او4 علي حسب الورقه



وبعدين اقطعها علي حسب الحجم اللي بحب الفه انا عن نفسي بحب الفه صغنن
كده وبعدين احطه في اطباق فل اللي طبعا بكون شيلاها من الاطباق اللي بشتري فيها
من السوبر ماركت مش بشتريها مخصوص يعني مااحنا فتوكات موفرين بقي مش بنرمي حاجه


وبعدين الفها ببلاستيك فيلم وعلي الفريزر كده بقي سواء استخدمته
للاكل او خزنته بيبقي موجود ونظيف وجاهز علاطول


طبعا العروق والحتت اللي بتفضل من الكرنبه انا مش برميها يابنات
بجيبها كلها واشيلها في علبه بلاستيك وعلي الفريزر
دي بقي في يوم زنقه بطلعها اقطعها حتت صغير وااحطها مع شويه ارز
يكونو فاضلين عندي من خلطه المحشي واسويها بتكون طعمها تحفه
والله وممكن اخللها واهوكله توفير وبيكون طعمها تحفه في المخلل


برضه بجيب من السوق الفول عشان الفطار والعشا لاني مش بحب اشتريه من بره
اولا مش هيكون نظيف زي البيت وكمان مش بييديكي كتير
انا بجيب نص كيلو بلديب4ج بنقيه كويس واسيبه منقوع من بالليل للصبح
وبعدين اغير المايه عشان ميعملش انتفاخ واحطه علي النار ومعاه طماطمايه
وجزرايه ومعلقتين عدس مغسلوين كويس وفص توم وبجيب من عند العطار ب2ج لون فول
بحط شعرايه بيخلي لونه وهم يابنات والله وبيفضل عندي اللون ده بستعمله يجي 30 مره
وعلي فكره هو مش مضر خالص وبعدين بسيبه يستوي براحته علي نار هاديه
وبعدين اعبيه في اكياس وعلي الفريزر طعمه وريحته واااااااااو
ولو عملته يوم بطريقه واتبقي من شويه بشيلهم في علبه بلاستيك في التلاجه
وتاني يوم بحط عليهم طمطايه وقرن فلفل حراق وفص توم بيبقي طعمه جنان واهو تغيير
وانتي وشطارتك بقي اعمليه بالطريقه اللي تريحك


البسله نفس النظام بجيبها افرطها واغسلها كويس و احطها في حله علي النار
تاخد غلوه وبعدين اطلعها تحت مايه ساقعه عشان تاخد صدمه
واسيبها تبرد واعبيها في اكياس الكيلو علي مرتين والنص بتاع التخزين
لوحده انا بحب اخزنها مش معاها الجزر في قلب الكيس لاني جوزي بيحبها
ساده بخزن الجزر لوحده بجيبه اغسله واقطعه واعبيه برضه مش بغليه علي النار
وادي البسله


البرتقال البلدي حبييبي بجيبه برضه 2ك مثلا للعصير بس بعد مااعصره بشيل منه كبايه علي جمب احطها في كيس اكنها مش موجوده وعلي الفريزر بجيبه اغسله كويس واقطعه كده



واعصره



واصبه في شفشق شايفين صافي ازاي

ودي الكوبايه اللي بشيلها في كيس


ودي بقي يابنات للتخزين عشان برضه محسش اني خزنت حاجه
طبعا انا ممكن استخدمها في كيك البرتقال او كعصير او لو هعمل كوكتيل
بيكون موجود عندي في اي وقت

نيجي لحاجه مهمه وهي قشر البرتقال اللي طبعا مش برميه
بجيبه احطه في صنيه واحطه في البلاكونه في الشمس اما ينشف
شويه ببشره واشيله في برطمان في التلاجه بستخدمه برضه في الكيك
وساعات بحط منه في طبق صغنن كده في التلاجه مكشوف عشان
يخلي ريحه التلاجه حلوه ونضيفه




البدنجان بجيبه اقوره واغسله كويس واسيبه ينشف وبعدين اشوحه
في شويه زيت واطلعه يبرد وبعدين اعبيه في اطباق فل وعلي الفريزر
واما باجي استخدمه مش بسيبه يفك خالص لا يعني يكون ماسك نفسه
شويه ده بالنسبه للخزين انما لو هناكله علاطول طبعا مش بعمل الخطوه بتاعه التشويح دي


القلقاس وده كنت بعاني منه الاول عشان كنت ساعات بجيبه واسيبه لغايه
مايبوظ وارميه بس بعد مابقيت انضفه واشيله ارتحت جدا
وكمان موجود عندي في اوي وقت
بجيبه اقشره واقطعه علي حسب منا عايزه سواء مكعبات لو هعمله بسلق
او اسلقه زي البطاطس بكمون



او صوابع لو هعمله صنيه في الفرن وبدعكه بملح وليمون عشان الماده اللي بتكون فيه
وبعدين بمسحه بفوطه نظيفه



السبانخ نفس الحوار بجيبها اغسلها كويس اووي واقطعها واحط معاها الكزبره
واسيبهم يتصفو كويس اوووي وبعدين اعبيها واشيلها في الفريزر
وساعات بشيل سبانخ من غير خضره لو هستخدمها في حشو الفطاير


الفراوله بجيبها اغسلها وانضفها كويس واقطعها وعليها السكر بتاعها
واقسمها في اكياس برضه بجيب مثلا كيلو للاستخدام ونص للتخزين


الليمون اما بجيبه بشيه في التلاجه للاستخدام بنفس طريقه الخيار دي

وبتاع التخزين بقي بعصره واحطه في بتاعه مكعبات التلج واما يتلج
بفرغه في قلب كيس بلاستيك واشيله في الفريزر



والباميه بعملها بنفس طريقه البسله بس بجيب نص ك للاستخدام ونص
للتخزين



والفاصوليا كمان نفس طريقه البسله وبرضه بجيب نص استخدام ونص
تخزين


الملوخيه بجيبها اقطفها واغسلها واخزنها
وده اللينك بتاعها

أفضل طريقة لتفريز الملوخية ويظل لونها أخضر

بجد طريقه وهم يابنات ومريحه جدا جربوها هي دي الملوخيه وهي مجمده




الجوافه بجيبها اغسلها وانضفها كويس واشيلها زي ماهي كده للتخزين
وللعصير لاستخدمنا برضه بجيب كيلو مثلا للاستخدام وكيلو للخزين
ولوغاليه بجيب كيلو كل مره واشيل منه وحدتين للتخزين عشان محسش بيهم



ده السلق بتاع القلقاس ده بقي بجيبه في يوم لوحده كميه محترمه
للسنه كلها اغسله كويس واقطعه واحط عليهم الكزبره والشبت
وبعدين اجيب حله احطها علي النار واحط عليها السلق والخضره
وراسين توم فصوص ومعاهم حته سمنه بلدي محترمه كده
واسيبهم علي النار يجي ساعه وبقلبهم كل شويه
السلق بيكون داب خالص
ونزل كل المايه اللي فيه وريحته فحفحت اقوم سيباه يبرد خالص
وبعدين بالكبه افرهم كويس اوووي واشيلهم في علبه علي الفريزر
بيقعد معايا طول السنه


ده البلح بجيبه واحطه علاطول في اكياس بقسمها وعلي الفريزر
ده للتخزين يابنات للعصير بلح باللبن بيكون طعمه رووووووووعه جربوه
هيعجبكم جدا مشروب طاقه هااااااااااايل


دي خلطه السمك والبدنجان بجيب فلفل احمر كميه كويسه اما بيكون رخيص
واغسله كويس واقطعه واحطه في الكبه معاه راس توم وربطتين كزبره
واضربهم كويس بس مهريهومش وبعدين اعبيه في علبه لحين الاستخدام وعلي الفريزر


الطماطم بجيبها واغسلها واحطها في اكياس دي لو هسلق لحمه او فراخ
ولو هعمل عدس او فول بطلع منها وبجيب طماطم جامده شويه للسلطه
دي بتفضل في التلاجه اما بتاعه الطبيخ بجيب كميه واغسلها واحطها علي النار
شويه وبعدين اسيبها تبرد واضربها في الخلاط وبعدين اصفيها واحطها في اكياس
واشيلها في الفريزر وبعمل منها شويه ببصل لخلطه المحشي او التسبيكه



الفلفل الاخضر او الشطه بجيبه اغسله واعبيه في اكياس وعلي الفريز
لو هستخدمه للقلي بطلعه قبلها يفك حاجه بسيطه بيكون تحفه


اللبن بجيبه اغليه واسيبه واسيبه يبرد وبعدين اسيبه في التلاجه
لتاني يوم يعمل وش وبعدين اجيب علبه اشيل الوش قشطه
لو هناكل منها اوك او لو هعمل ارز معمر بستخدها غير كده
بحطها في الفريزر واحوش في الشتا كميه حلوه كدهوبعدين اطلعها اعملها سمنه
بتبقي روووووووووعه واللبن بقسمه في اكياس واشيله في الفريزر


التوم ده كنت مخزناها اول مطلع بفرمه واعبيه في اكياس طبعا كلكم عارفين الطريقه



وده ورق عنب كان عندي برضه من السنه اللي فاتت بشيله اخضر
وبعدين اطلعه ياخد غلوتين وااستخدمه برضه اما بشتريه بجيب ربع للاستخدام
وربع للتخزين



طبعا الحاجات دي مش بشتريها في يوم واحد دي كل مره بروح
بجيب اصناف مختلفه بس باخد يومين ورا بعض في التوضيب
صدقوني بتوفر جامد اوووي وقت ومجهود وفلوس
يارب تكونوا استفدتم من الموضوع ولاتنسوني من دعواتكم
في رعايه الله

منقوول 



قد يهمك أيضا:
 

تفريز البسلة بالصور