شوية تكات هتخلى أكلك روعة ان شاء الله

الموضوع للعضوة

om gmal

من فتكات

اتمني موضوعي ده كمان يعجبكم ويفيدكم دي شويه حاجات بعملها في الاكل بتخلي الكل ( ما شاء الله تبارك الله ) بيحب طعم اكلي والحمد لله
1 لما تعملي رز بشعريه حطي شويه بهار مشكل صغيرين في الشعريه بعد ما تتحمر وحطي ملح الرز والمايه ( بس مش تكتري عشان تعرفي تظبطيه ) وسيبيهم يغلو غلوه مع الشعريه وبعدين حطي الرز هيديكي طعم مميز كانك عملاه بمرقه

2 لما تعملي ملوخيه مثلا او فول بالطماطم ابشري الطماطم او قطعيها مكعبات صغيره واضغطي عليها كويس في طبق وبلاش تعصريها في الخلاط

3 لما يكون عندك شيت وكسبره وبقدونس خضر مش تغسليهم وجيبي علبه تلاجه وحطي فيها منديل وحطيهم مفرودين وفوقهم منديل هيفضلوا طاز وقت طويل

4 لما تسلقي فراخ بيضا شيلي جلدها ودهونها لانهم سبب الريحه الوحشه
( الزفاره ) واصلا كلوسترول في الفاضي وقطعيها اربع قطع عشان تستوي بسرعه وشوحيها في بصله و مستكه وحبهان وورقه لوري وقرنفلايه واحده ههههه وسيبيها معاهم علي نار هاديه كام دقيقه والحله متغطيه وبعدين حطي فلفل اسود و شويه بهار مشكل ( فلفل اسود وكمون وكسبره و قرفه وشطه وببريكا و معلقه جنزبيل )

5 لما تعملي عجينه بتزا زودي الكميه واحتفظي بقطعه او اتنين في الفريزر عشان لما تحبي تجهزي عشا سريع تكوني جاهزه

6 لو عاوزه تخلي فراخك المسلوقه بطعم المشويه بعد ما تسلقيها اعملي تتبيله عباره عن بصله متوسطه وفصين توم وطماطميتين وشويه كسبره خضرا وملح وبهار واضربيهم في الكبه وتبلي بيهم الفراخ المسلوقه وفي الطاسه نقطتين زيت وحمري علي نار هاديه لحد ما التتبيله تستوي عليهم وتديهم طعم

7 لو عندك سمك مشوي بارد حطي نقطتين زيت في الطاسه وسخنيهم علي نار هاديه بيكون طعمهم جميل جدا

8 لو عندك فراوله اغسليها واقطعي القمع بتاعها ونظفيها وسيبيها زي ما هي وفي علبه الثلاجه في الرف اللي فوق في الثلاجه وخدي للعصير علي طول

9 لما تعملي مرقه لحم او فراخ حطي فص توم ني بعد ما تستوي وقبل الغرف وصفي المرق ديما قبل التقديم

10 لو عندك بسله في الفريزر عشان طعمها يكون طاز شوحيها في بصله صغيره وبهار وورقه لوري واعملي تسبيكه وحطيها عليها و بعد ما تستوي حطي قطعه فلفل اخضر وفص توم صغير فيها وسيبيها تغلي غلوه هتديها نكهه جميله

11 لما تقلي سمك اقطعي الراس بتاعته واعملي منها احلي رز صياديه مع السمك جيبي شويه زيت و بصله وحمريها جاااااامد وشويه فلفل اسود وحطي روس السمك و سيبيهم لحد ما لونهم يكون بني غامق وحطي الميه ومش تكتري وسيبيهم يعملوا مرقه وصفيها وجيبي الرز الابيض المغسول وحطي المرقه دي عليه مع الملح وسويه عادي 

12- وفى تكه غيرت خالص طعم المعجنات
انى بقيت اعجنها بزبادى بس بدل السؤال بتطلع هشه وتحففففه

13- لما باعمل تسبية الماحشى باحط الرز وابش عليه جزر واهدى النار عليه دقيقتين
فى عجينة البيتزا بخرمها بالشوكة وبعدين ادخلها خمس دقايق الفرن وبعدين اطلعها واحط عليها الحبشتكنات

14- -الفراخ قبل ما أسلقها بكون بشره بصله واحط عليها فلفل اسمر وشوية ملح صغيرين خالص وبحشي الفرخه بس من تحت الجلد يعني بين الجلد واللحم بس مش حشو كتير لا بسيط جدا مجرد نكهه وتحاولي تنشري التتبيله في كل الفرخه.. دي بتخلي الفراخ ريحتها عالنار تحفه وطعمها مختلف وخصوصا للملوخيه
وقبل ماتستوي بشويه بحط باقي البصل المبشور في الشوربه وعليه معلقه صغيره كسبرة ناشفه وممكن فص توم

15- - البسله بحط لها معلقه سكر وهي عالنار بتخليها معسله وحلوه اوي وساعات بحط نص معلقة سكر علي صلصة المكرونه وهي عالنار
- الباميه بعد ماتستوي حطي لها معلقة سمنه بلدي وشوية كسبره ناشفه وتقفلي غطا الحله عليها شويه

16- - المحشي لو هتعمليه بالسمنه البلدي يبقي بعد ما الصلصه تتسبك تحطي السمنه لانك لو حطتيها من الاول مش هيبان الطعم في الاكل
وبعد ماتدوبي السمنه في الصلصه حطي الرز عالنار وقلبيه تقلبتين في صلصه المحشي عشان يشرب من الصلصه بيكون حلو اوي