جدول أكلات الاسبوع.. مش هتحتارى تطبخى ايه بعد كده

جدول أكلات الاسبوع.. مش هتحتارى تطبخى ايه بعد كده 

 

 انا عاملة جدول بدل ما كل شوية اسأل جوزى هناكل ايه بكره

وبيوفرى لى وقت انى اكون عارفة هطبخ ايه بكره فلو هطبخ لحمة او فراخ بسلقهم من بالليل

ولو خضار عايز يتسلق كمان بسلقه بالليل

اتمنى كل بنوتة تشارك معايا ولو عندها جدول تكتبه

ولو عندها اكلات مختلفة تقول لنا عليها

المهم ده الجدول

1. الجمعة: لحمة او فراخ
2. السبت: الأكل اللى باقى من الجمعة أو أى بواقى أكل عندى
3. الأحد: سمك
4. الاثنين: لحمة أو فراخ
5. الثلاثاء: أكلة منوعة
6. الأربعاء: سمك
7. الخميس: عيش

طيب افسرلكو بقى الجدول


الجمــعة:

فـراخ
فراخ صينية -محمرة -بانيه -شيش طاووق- شاورما -فراخ بالثوم -كفتة فراخ






أو
---------------------------
لـحمـة

لحمة فى صينية بطاطس- لحمة وأى خضار (بامية -بسلة -كوسة -لوبيا-فاصوليا.....)
-لحمة وبصل وطماطم فى الفرن بقول عليها كـوسـتيليتا -بفتيك
لحمة بيكاتا اى طريقة لحمة يعنى




طبعا ممكن بدل اللحمة والفراخ يبقى سمان او أرانب



السبت:

انا بطلع اى خضار فايض عندى او فراخ او لحمة لانى مش برمى حاجة بعين كله فى الفريز
ولو مفيش فراخ او لحمة بسلق بيض جنب الخضار




الأحــد:

سمــك
مشوى -مقلى-فيليه مقلى -فيليه صينية -سمك صينية -سمك صيادية _سمك سنجارى مع بطاطس...




الاثنين:

فراخ أو لحمة





الثلاثاء :

أكـلة منـو عة:

جمبرى صينية _جمبرى كفتة او بالصلصة _جمبرى مسلوق جكبرى مدفون فى الرز

كفتة _مكرونة وكبدة _ مسقعة باللحمة المفرومة _مكرونة بشاميل باللحمة او الفراخ

مكرونة وبيض مسلوق

مكرونة اسباجتى وعليها صلصة باللحمة المفرومة

رز وعدس _رز وفول _ كشرى

بطاطس مدفونة فى الرز

رز وبطاطس محمرة وبيض مسلوق ومعهم سلطة

رز بالكبد والقوانص _ بشاميل بالكبد والقوانص _محشى

بطاطس بالكبد والقوانص كان فى فتوكة عملاها هنا حلوة اوى



أى أكلة لقيتيها فى فتكات وعجبتك وعايزة تجربيها وهكذا يعنى

انا فعلا استفدت من قسم الطبخ هنا اوى وعملت منه اكلات حلوة


الأربعاء:

سمك



الخميس :

عيش وأى حاجة بقى

عيش وباذنجان مقلى وبابا غنوج وبطاطس محمرة

عيش وشوربة عدس

عيش وكبدة اسكندرانى

عيش وتونة ومخلل
عيش وسوسيس مسلوق

انا بجيب السوسيس واسلقه مع طماطم وزتون وكاتشب ومعلقة صلصة وبصلة ترانشات
وسيبهم على النار شوية بيطلع تحفة
وممكن تستبدلى السوسيس باى حاجة تانية وتعمليه بنفس الطريقة
عيش وبطاطس محمرة وبيض وسلطة طحينة وسلطة خضراء




وهكذا

اللى تحب تزود حاجة او تعدل حاجة ياريت

اتمنى نفيد بعض

انا والله تعبت فى الموضوع ده وقصدى افيدكم

فياريت تدعو لى دعوة حلوة ان ربنا يبارك فى جوزى واولادكى ويحميهم