طريقة كفتة الفراخ

كفتة الفراخ بطريقة لولا شومان

كفتة الفراخ Loula shouman

المكونات
1 كيلو فيليه فراخ صدور غسلته بميه وخل وملح
وشطفته كويس وصفيته ونشفته بفوطة مطبخ
1 بصله متوسطه
من 5 الى 7 فصوص توم حسب الحجم
فلفله خضراء وواحد قرن شطه
1 بيضه

التوابل
فلفل اسمر بردقوش بودر
روز ماري بودر توم بودر
جنزبيل بودر حبهان مطحون
بصل بودر زعتر بودر
لاورا بودر
ملح وشطه
ملعقه كبيره بقسماط ناعم

الطريقه
ضربت التوم في الاستور ماستر وضفت البصله وضربتهم كويس وضفت الفلفله الخضرا
وقرن الشطه وضربت كويس جدا وضفت فيليه الفراخ وفرمتهم مع بعض وضفت البيضه
والتوابل وقلبتهم كويس جدا وضفت ملعقة بقسماط ودخلت الخليط التلاجه حوالي ساعه
وخرجته عملته كور متساويه وشكلتها صوابه وضغط عليها من النص فردتها شويه
علشان تستوي من جوه ودخلتها التلاجه نصف ساعه
وحضرت طبق فيه دقيق وطبق فيه بقسماط وقليل من نفس توابل الكفته
وطبق فيه بيض مضروب بقليل من اللبن وملح وفلفل اسود
خرجت الكفته نزلتها في الدقيق وبعدين البيض وبعدين البقسماط
وضغط عليها كويس مع البقسماط ودخلتها التلاجه
وحضرت زيت غزير وحمرتها في زيت وسط مش سخن قوي ولا بارد قوي
علشان تستوي من جوه وخرجتها على فوط مطبخ
وقدمتها سخنه مع بطاطس صوابع محمره ومكرونه وسلطه خضراء
وسلطة طحينه
وبالف صحه وعافيه
جربوها هتعجبكوا

معلومه
بياض البيض ما اضربش كويس كنت مستعجله جدا فاستوى بسرعه
رمضان والوقت سرقنى
وعمل لون غامق شويه في بعض اجزاء الكفته مش مشكله
المهم تعرفوا الطريقه