تعالى معايا ننضف تلاجتنا وننظمها

* ابدئي طلعي كل اللي في تلاجتك وممكن تفصليها قبلها بفترة

اغسلي التلاجة كويس جدا ونظفيها وبعدين لمعيها باي معقم او خل او ليمون

* طبعا لما تطلعى الحاجة برة التلاجة ممكن اساسا تلاقي حاجات ناسياها ودا طبعا خطأ في التنظيم ودا اللى هاكلمكوا عنه دلوقتى

* قسمي حاجتك على رخامة المطبخ طبعا بعد ما ترمي الحاجات اللى مركونة من فترة او تاريخ الصلاحية انتهى زى الزبادى

اعملى مجموعات من الحاجات اللى زى بعض يعنى صينية او سبت لحاجة السندويتشات زى الجبنة النستو والمربى والرومى كدا عشان لما تيجي تحطى العشا او الفطار يبقى سهل عليكي

* اى طبق عندك شيليه فورا وحطي كل الاكل في علب وبلاش الاطباق خالص

* اعملي رف للحاجات اللى مش هتستمر طويلا ممكن تقسميها لسبتين : سبت فيه الخضرة الورق زي جرجير كرات لانها بتدبل وتصفر بسرعة تبقى قدام عينك في الرف تخلص وهيا طازة , والسبت التانى لباقي اكل امبارح اما تاكلوه تانى يوم او تاكليه لعيالك طول النهار ولو كتير وزهقانة يبقى ع الفيزر , وطبعا حطى معاهم علبة فيها اللانشون لانه كبيره يومين

نصيحة كمان حطي اللانشون في الفريزر وخرجي على الاد ويكون بينهم كيس علشان تفصليهم بسهولة

وشيرين كانت عاملة بوست حلو لحفظ البقدونس والخضرة وبتعد بالاسبوعين
تحطيهم فى علبة بلاستيك وفوق وتحتهم مناديل ورق اهم حاجة مايكونش مبلولين خالص

*درج الخضار واه من درج الخضار ممكن تحطي فيع علب بحيث الاوطة تكون لوحدها وعلى جمب الفلفل والخيار والجزر مثلا وطبعا الجزر تحت والخفيف فوق لانه بيبوظ بسرعة , الفايدة ان المية هتنزل في العلب مش في الدرج وهتفضل نظيفة فترة اكبر مش 3 ايام وتبقى لازم تنظفيها تاني

* حطي الفاكهة بعيد عن الخضار علشان تكون ناشفة وطازة ممكن في سبت لوحدها على الرف اللي فوق الدرج

ملحوظة ممكن تغسلي الخضار كلله والفاكهه علشان تكون جاهزة بس لو عملتى كدا لاااااااااااااااازم تنشفيهم كويس جدا في فوطة نظيفة
وممكن تنتهزيها فرصة وتاخدي واحدة من خضار او فاكهة على جمب مثلا خيارة مع جزرة مع قرن فلفل في علبة نظيفة او كيس ليه بلوك لو تعرفوه بحيث لو جعتى او ابنك جاع يبقى عندك حاجة جاهزة وهتعجبه الفكرة وهياكل بدل الشيبسيهات والحاجات دى
سيبي دايما مكان واسع كبير فاضي ليه؟ لو جبتي مثلا بطيخة فجأة او تورتاية او محتاجة حلة مليانة عصير لرمضان والضيوف او كاسات الحلو يكون ليهم مكان دايما فاضي للمفاجآت

* لو اشترتي زبادي مثلا شوفي تاريخ الصلاحية وحطي دايما كل الحاجات اللى تاريخها قديم لبرة والجديدة وتقعد دخليها لجوة , وكمان الحاجات الطويلة لورة والحاجات العلب القصيرة قدام

* لما تجيبي برطمان عسل اسود او ابيض بيوقع ويلزق تحته وحتى زجاجات الدوا بتاعة الاطفال ( الحل انك تحطي تحتيهم الآتي : علبة فاضية صغيرة , او تقصي غطيان بلاستيك م بتاعة علب السمن على قدهم علشان دايما اللي يوقع يوقع عليهم ويلزق فيهم مش تفضلي تزقي في الازازة تطلع ما بتطلعشي

* كدا بقى فاضل الباب بتاع التلاجة

طبعا البيض كتير تلاجات نظامها بيكون البيض فوق

ملحوظة اللي مش عايزة اكلها ينشف ما تحطهوش فوق جمب البيض

حطي دايما في الارفف الزجاجات ( مية عصير صوصات كاتشاب مايونيز تتبيلات انتى عملاها ) وكمان الزجاجات الصغيرة فوق والطويلة تحت

واعملى مكان للادوية اما سبت على بعضه واما في باب التلاجة لو اطفالك مش هياخدوه لوحدهم
حطي بقى شوية كربوناته في علبة مفتوحة في الفريزر لو بيلقط روايح بسرعة فيه ناس بيكون بلاستيك التلاجة عندهم كدا مهما نظفوا الاكل يلقط ريحة وطعم دايما معروف من الفريزر وممكن زيها في التلاجة

البرطمانات بقى يا بناااات : ليه يتبقى منك شوية ملوخية او طبيخ او تتبيلة تروحي حطاها في طبق غويط زى ما هيا كدا في التلاجة ؟ هه سامعانى ياللي هناك ؟ ايه رايك لو تحطيها في برطمان زجاج نظيف ومتنشف وتقفلي عليها وبكدا مش هتتقلب في التلاجة وكمان هتبقى مقفولة كويس وهتاخد ربع مسافة الطبق تقريبا ها ايه رايكوا؟

آخر حاجة بقى هاتى قلم واستيكر وورقة

القلم علشان نكتب بيه على العلب التاريخ وكمان في الفريزر تقدري تفرقي فين عصير الطماطم العادي من التقلية ام توم وخل مثلا

كمان ممكن تعلمى على البيض علشان تفرقيه من بعضه لو بيضة قديمة علمى عليها اى علامة مثلا رقم 1 علشان تستخدميها اول واحدة وكمان لو سلقتى بيض وماحدش كله ولسه بقشره ممكن تعملى عليه اى رسمة او خط حتى تعلميه من البيض النى

واخيرا كل سنة وانتم بالف خير وياريت اللى تعمل حاجة تيجي تقوللي علشان نتشجع

إعجاب ·