بالصور منظفاتي اللي مريحاني في حياتي وطرق التنظيف

الموضوع للعضوة: شلت همى بخفة دمى
من فتكات

النهارده يابنات انا جيبالكم رفيو
لمنظفاتي
اللي بستعملها في البيت واللي الكل بيشهد
بنظافه بيتي وغسيلي
وبيتي اللي دايما ريحته تحفه

نبدأ يابنات علي بركه الله

اول حاجه



اولا دي المنظفات اللي بستخدمها في الغسيل
علي اليمين كلوركس للهدوم البيضا
وده امن تماما علي الغسالات الاوتوماتيك
روعه يابنات في التعقيم والتنظيف
طبعا معظمكم عارفه
انا ساعات بجيب الحجم ده تقريبا ب5ج او 6ج
بيقعد معايا شهرين
وساعات بجيب الاصغر منه لتر تقريبا ب3 ونص
بتنقعي الهدوم البيضا من بالليل في مايه سخنه وشويه كلوركس من ده
وشويه برسيل بس كده والصبح تحطيهم في الغساله علي 90درجه وحرف الa
مع شويه برسيل وفانيش روووح قلبي من جوه وده هتكلم عنه بعدين
وشوفي النظافه والبياض الساطع

جمبه علاطول كلوريل للالوان

ده بقي وهم للالون بيخلي الالوان تزهزه علي الحبل
وبيحافظ عليها من البهتان
ده غير انه حلو اووي للبقع
انا بجيبه ب4ونص بيفضل معايا طول الشهر
وساعات بيفضل اكتر من كده علي حسب الاستخدام
بحط منه غطا واحد مع الهدوم الملونه
وشوفي النظافه
بس خلي بالكم في هدوم مينفعش معاها
الكلوريل ده لازم تشوفي تعلميات الغسل كويس
وتقريها من علي الهدوم
وساعات لو فيه بقع بدعكها الاول قبل ماحطها في الغساله
بالكلوريل ده واسيبه شويه وبعدين اغسلها



دي علبه كانت بتاعه كوبايات فاضيه عندي استخسرت ارميها
طلعت مواهبي فيها بقي ههههههه وهقولكم بحط فيها ايه

بحط فيها الفانيش ده هو بودر من جوه
اللي قولتكم عليه فوق اني بحطه مع الهدوم البيضا
ده بقي كلمه وهم قليل عليه
قمه في النظافه ده بقي حبيبي حبيبي حبيبي لو اطول اخده في حضني وانا نايمه
كنت خدته
بس فيه ناس هتزعل
وكمان حلو اووي للبقع والالوان
فيه منه اكياس الكيس ب2ج
انما ده بجيبه ب16ج
بس بيفضل كتير معايا

اما علبه الفانيش دي بقه بتفضي بحط فيها ايه
زهره
وعلبه تانيه كمان ملح ليمون
وهما التلاته بحطهم
في العلبه الحمرا اللي انا عملاها دي
ومعاهم البرسيل العادي بتاع الغساله الهاف

ندخل بقي علي الازازه اللبني دي طبعا
داوني غني عن التعريف
ساعات بجيب دي اللبني دي

وساعات بجيب دي


الاتنين
ريحتهم وهم وبيقعدوا كتير لاني بخففهم شويه
وساعات بحط عليهم معطر من عند بتاع المنظفات
بصوا بقي في طريقتين بستخدمهم في التعطير
الاولي
اللي هي تقليديه اننا بنحط شويه مع مايه الشطف
التانيه بقي اني بجيب بخاخه
واحط فيها شويه داوني واخففهم بمايه
وارش علي الهدوم بعد ماتشطف وانتي بتنشريها
طبعا الطريقه دي موفره
بس عايزه صبر
ودي البخاخه اللي برش بيها ساعات

هي مش بخاخه بمعني كلمه بخاخه دي كانت ازازه
فا كان فيها كلونيا كده منعشه بستخدمها
واما خلصت اعدت استخدمها في كده
منها توفير ومنها شكلها اشيك من البخاخه
وبرضه برش منها علي الستاير والسجاجيد

طبعا البرسيل حبيبي مش بحب اغيره لاني غيرت كتير
ومرتحتش غير في ده




الحلوه دي بقي غساله بس صغغنه شويه ههههههههه
بس مش غساله حقيقيه يعني دي ديكور بس
كنت اشتريتها من بنوته من الفيس
دي بيتحط فيها المسحوق والدرج اللي تحت
بتدخليه لجوه كده وتشدي يطلعلك مسحوق
علي اد الغسله
شكلها شيك اووي ومشرفه قدام اي حد يجيلك من الضيوف



ده برسيل جيل بجيبه للغساله الهاف
جميل اووي وريحته تحفه
اما بغسل بيه مش بحط داوني



ده برسيل للهدوم السمره
كان معاه كيس بريل هديه ههههههههه
اول مره الصراحه يعملوها بس يالا مصلحه
حلو اوي يابنات في المحافظه علي الهدوم السمره والغامقه عموما
خاصه اني منتقبه وهدومي كلها سوده
وبرضه زوجي ليها هدوم غامقه كتير
انا بقي بغسل الهدوم السمره علي ايدي
مش في الغساله
عشان متتبهدلش
وبنشرها في الضل وساعات بحط العبايه علي الشماعه واعلقها علي ماسوره
الستاره بتاعه البانيو تنقط طول الليل بقي وتاني يوم علي اخر النهار بتكون نشفت والطريقه دي
رائعه جدا يابنات وبتحافظ علي سمار العبايه
ولو فيها كمان شغل استرس او خرز يعني


ده بقي يابنات فانيش السائل
زيه زي البودر بالظيط
نفس الفاعليه بتاعته يعني
ساعات بجيب ده وساعات بجيب التاني
هو حاليا انا فضي حطيت فيه
معطر كده بجيبه ب2ج من عند بتاع المنظفات
هو شبه الزيت بخففه لغايه مايملي الازازه
وبعدين امسح بيه الارض
نقطه بس عشان ميرغيش فيه ممنه بالروايح الحريميانا بجيب كاسليا واسكيب وورد بلدي
وشمي بقي ريحه النظافه وكمان لمعان الارض

كمان ساعات بحطه في بخاخه وارش بيه
الستاير والسجاجيد وفي الجو كده وهم يابنات


كده خلصت الغسل

ندخل بقي في المواعين


انا بستخدم فيري يابنات

البرتقال جميل اوي وريحته وااااااو


بحط معاه شويه خل للمعان
بيخلي الكوبايت واوي حاجه ازاز بتلمع
وبستخدم للومنيوم صابون وش او صن لايت
بيخلي المواعين تبرق من النظافه

دي العلبه اللي بحط فيها السلك بتاع المواعين
بقطعه واحطه فيها انا اللي عملاها علي فكره
بازازه بيبسي فاضيه
مواهب بقي هههههههه
معلقاها في المطبخ منها شكل ديكوري ومنها توفير للسلك كمان

جزء التعقيم عندي



دي بخاخه فيها كلور علي ديتول
مخفف برش بيه ارضيه الحمام والمطبخ والقاعده بتاعه الحمام للتعقيم


ندخل بقي علي المسح

الكلور سايب بجيب ب3ج بيفضل طول الشهر
وبخففه وساعات بيقعد اكتر من شهر كمان
لتنظيف الحمام والارضيات
والاحواض

الديتول بجيبه السايب
بجيب ب2ج بيقعد شهرين وبخففه بمايه وحطي شويه صغيرين
علي مايه المسح مطهر ومعقم كمان


انا كمان بجيب هاربيك سايب ب2ج يفضل شهرين
وكمان بجيب بريل سايب ب2ج بيقعد شهرين معايا لغسل الاحواض

اخيرا ندخل علي التلميع



ده مستر ماسل الازازه دي بفضل الله بتقعد معايا سنه
هههههه متستغربوش
هقولكم ازاي
انا بجيبها واقسمها في حاجه تانيه
واخففها بنقطتين فيري وشويه خل ومايه
وكل نص بيقعد معايا 6 شهور

ده بيلدج للخشب لاني مش بحب الجاز في التلميع
بيقعد معايا كتير اوووي
وكمان بيحافظ علي الخشب من التشققات واتقشير