اسهل واطعم أرز باللبن زى المحلات بالظبط

السر بتاع المطاعم انهم بيسلقوه فى اللبن وبيحطوا عليه بسحلب
والسحلب اصلا طعمه وريحته جميله
فأنا قلت عشان اضمن سوى الرز
غسلته كويس بميه سخنه من السخان مش بارده وسبت عليه الميه السخنه لحد مابقت الميه صافيه والرز باين وصفيته كويس
وطلعت كيس اللبن من الفريزر

كيلو لبن استخدمت معاه نص كوباية رز المهم سخنت اللبن على نار هاديه

تمام نار هاديه و حطيت عليه الرز وكل شويه اقلب لحد ما اللبن غلى كويس والرز جواه طبعا وبعدين لاقيت الرز ابتدى يستوى فرحت اوى قمت قفلت النار وسيبتهم ساعه قلت عشان اضمن خااااااااالص سوى الرز وبعد ساعه فتحت النار عليه تانى وضيفت عليهم معلقتين او تلاته كبار سحلب مدوبين فى شوية ميه ع البارد مع نص كوب سكر وضفتهم وقلبت لحد ماوصلت للقوام المطلوب وقفلت وحطيت كيس فانيليا وقلبت

ونستمر فى التقليب باستمرار عشان الرز مايلزقش بس واسيبه معتش اقلب عشان يعمل وش حلو كده

وانصحكم بدل كيس الفانيليا استبدلوها بالفانيليا السايله جميييييييييله جدا
وصبى وحطى فى التلاجه ودوقى اجمل ررز بلبن بس يستحسن تغطى عليه فى التلاجه زى الجاهز كده عشان وشه مينشفش ان شاء الله

هقولكم بقى على شوية تكات تخلى الطعم احلى ان شاء الله

1-اخت جوزى كانت محوشه كميه كبيره من وش اللبن ولما عملت الرز بلبن ضافت كميه محترمه منه وطعمه كان رهيب

بس الافضل طبعا انكم تطلعوه قبلها بيوم يفك فى التلاجه وبعد ماتقفلى على الرز بلبن وتحطى الفانيليا تقومى حطه وش اللبن او القشطه وتقلبى حلو وتغرفى طبعا الطعم هيكون اغنى واحلى

2- الزبيب تنقعيه شويه فى ميه 5 دقايق تطريه وتضيفيه اثناء تسوية الرز بلبن قبل ماتحطى السحلب بيكون طعمه اجمل
بس لسه مجربتهاش

بعض الاخطاء اللى ممكن تقعوا فيها:

1- الرز بتضفيه للبن من الاول خااااااااالص يعنى تجيبى اللبن من اللبان وتحطيه ع اللبانه مع الرز
ولو كسلتى وحطتيه فى الفريزر عادى سبيه يفك شويه على النار وحطى معاه الرز

2- من فضلك النار تكون واااااااااطيه كانك بتسوى الرز العادى كده ليه بقى؟
عشان لو عليتى النار لما يجى يغلى للاسف الرز هيكون لسه نى
واحنا عاوزين الرز يستوى براحته خاااااااااالص

3- متقفليش خالص عليهم الا لما اللبن يغلى عشان تضمنى سوي الرز  وانه تمام ساعتها اقفلى وسبيه شويه

4 - ارجعى افتحى النار عليه تانى والاحسن انك تضيفى  سحلب زى ما قلت قبل كده وساعتها على النار براحتك مش لازم توطيها احنا كده خلاص ضمنا ان الرز استوى

وفىناس تحب تحط نشا لو كده ماتكتريش كفاية معلقة


اقول بقى الاضافه الجديده :

طبعا سمعنا كتير عن موضوع الكريمه اللبانى وانها بتدى طعم كريمى وبتعزز من طعم الرز بلبن
طب انا فكرت فى حاجه احسن واوفر وخصوصا ان كريمة الخفق بتكون غاليه
عملت اييييييييييه؟
جبت ربع كوباية كريم شانتيه بودره وضربتهم بالمضرب كويس اوى مع ربع كوباية لبن مثلللللجه لحد ما نفشت وبقت تمام
وبعدها حطيت عليها كام معلقة قشطه كنت محوشاها من وش اللبن بتاع 3 معالق كبار او زى ماتحبى وقلبتهم مع بعض بالمغلقه مش بالمضرب لحسن تتحول لذبده
المهم خلاص قوام الرز بلبن اتضبط
قفلت النار وضفت الفانيليا السايله ومعلقة كبيره مية مورد واللى عرفته من فتوكه ان ماء الزهر بيكون اجمل لسه مجربتوش
وبعدها ضفت الكريمه بتاعتى وصبيت فى الاطباق
وقمت صبيت فى برام صغير كده قصدى طاجن فخار صغنون وحطيت على وشه الباقى من الكريمه وركنته على جمب لحد ما ولعت الشوايه وحطيته تحت الشوايه ياخد لون دهبى جميل
وحطيتهم فى التلاجه لتانى يوم وغطيت عليهم طبعا
وكانت النتيجه زى الجاهز واجممممممممممل ولله الحمد
حبيت اقولكم على اضافتى
وفيه حاجه كمان لسه مجربتهاش
انك تنقعى شوية زبيب فى مية زهر وضيفهم اثناء تسوية الرز بلبن بيقولوا بتطلع جميله لسه مجربتهاش
وناس تانيه بتضيف حتة زبده وبرده مجربتهاش
ياريت اللى جرب يقولنا النتيجه
منقول