حل أكيد لتساقط الشعر وجفافه ان شاء الله

بصي بداية كده لازم تفهمي ان شعرك ده ابنك الصغير , حبيه كده واهتمي بيه
غالبا هتلاقي اللي مش محجبات شعرهم بيبقى حلو جدا, ده طبيعي متتعقديش, لسببين وهما ان البنت بتهتم اكتر بالحاجات اللي باينة منها, يعني انتي لو شعرك بتخرجي بيه ف طبيعي هتهتمي بيه جدا و تحبي يبقى ف احسن صورة ديما لكن لو واحدة محجبة بتلاقيها مش مهتمة اوي عشان كده كده محدش هيشوفه غير اللي ف البيت فبتكسل تهتم وتلاقيها كل تركيزها على بشرة وشها بس, السبب التاني ان الحجاب ذات نفسه بيكتم الشعر و بيقلل التهوية خصوصا أيام الصيف الأمور بتبقى صعبة وكمان شوية ممارسات غلط بيعملوها المحجبات بتبهدل شعرهم

ف ده يقولك ان لازم تهتمي بشعرك اكتر من كده شوية والا على بال ما تكبري شوية هتلاقيه راح كله و فتلته بقت في الضياع

يمكنك قراءة

اعرفى نوع شعرك وطريقه علاجه والعناية به

نبدأ بقى
أولا انا متأكدة ان شعرك بيقع, وكل واحدة شعرها بيقع لأسباب مختلفة
فأنتي تروحي لدكتور محترم كده خليه يكشف على شعرك عشان الأسباب كتيييييييييييير للموضوع ده
طبعا انتي هتقولي دكتور ايه وبطيخ ايه وملوش لازمة
هقولك براحتك خليكي قاعدة كده بتبصي على البنات اللي شعرهم حلو و بتتقهري من جواكي

اللي محتاجة دكتور هي مين, اللي شعرها بيقع بغزاااااااااااااااارة, يعني فكي شعرك دلوقتي و مرري ايديكي فيه وشوفي كام شعراية بيطلعوا معاكي

لو 5 شعرات مثلا فمتقلقيش ده طبيعي
لو وصلتي ل 15 او 20 يبقى انتي ف مشكلة ومحتاجة دكتور يحلهالك
لو اكتر من كده يبقى غالبا الدكتور هيكتبلك على حاجة فيها مينوكسيديل وده بتفضلي تستخدميه طول عمرك

عموما خلال اليوم انتي بيقع منك 100 شعرة , يعني متقلقيش وتصوّتي, مفيش واحدة شعرها مش بيقع, ده لازم يحصل أصلا لان الشعر له دورة حياة
ومش معنى ان وانتي بتسرحي طلع ف الفرشة 5 ولا شعرات يبقى انتي بتعاني من التساقط ... RELAX يعني

هفهمك حاجة عشان لما تفهمي شعرك الأمور بتبقى أسهل
الشعرة بتاعتك بتمر ب 3 مراحل
اناجين وكتاجين و تالوجين
Anagen, Catagen & Talogen

مرحلة الأناجين دي هي اللي بتحدد شعرك هيبقى عامل ازاي, وهي السبب ف ان في ناس شعرها تقيل و ناس خفيف وناس طويل وناس قصير, والكلام ده له علاقة بالجينات, عشا كده بتلاقوا ان تلت تربع الهنود شعرهم رهيب ما شاء الله, مش عشان حاجة معينة بيعملوها بس هما أصلا جيناتهم كده
الشعر ممكن يفضل ف مرحلة الأناجين دي من سنتين ل 7 سنين, كل واحدة وجيناتها بقى, وكل ما يفضل ف المرحلة دي أكتر كل ما الشعر يبقى أكثف وأطول
عشان كده تلاقوا ناس شعرها ممكن يطول لحد كعبها و ناس شعرها مش بيعدي كتفها

المراحل التانية والتالتة مش ضروري تفهميهم اوي, بس اعرفي ان ف المرحلة التالتة البصيلة بتاعت الشعر بتفضل ساكنة او resting لمدة 2-4 شهور
يعني ايه
يعني لما تهتمي بشعرك متتوقعيش انه ف يوم وليلة هيقوم يجري قدامك ويوصل لركبتك
الموضوع محتاج صبر
مش أقل من 3 شهور عشان تبدأي تاخدي بالك ان شعرك بيتغير و بيحصله حاجة
بس طبعا خلال الفترة دي هتحسي ان صحته بقت أحسن بكتير و هيبان عليه انه متغذي

بعد ما ال 3 مراحل بيخلصوا الشعر بتموت وبتقع, والبصيلة بتعيد دورة حياتها تاني وتطلعلك شعرة جديدة

***************************
يمكنك ايضا زيارة هذا الموضوع للاستفادة

نصائح للعناية بشعرك أسفل الحجاب

طيب, بعد كل الرغي والكلام الفاضي اللي انا بقوله ده
أكيد كل واحدة فيكوا مش عارفة تبدأ منين
بصي يا ستي
اول حاجة افهمي ان البصيلة بتاعت شعرك دي هي ابنك, محتاج ياكل عشان يكبر والا هيتبهدل
أكلي شعرك
أنا مش عارفة ليه يا بنات مش بتقتنعوا بموضوع التغذية ده
بتعتبروه أي كلام وحاجة ملهاش لازمة والناس بتقولها وخلاص وان المهم هو المنتجات وماسك المايونيز و الزبادي و المكرونة و البامية
التغذية هي العامود الفقري بتاع شعرتك
اديها ماية تديكي طراوة
على رأي الأجانب You are what you eat
اي حاجة تاكليها بتنعكس على شعرك, اديله ماية كتيييييييييييييييييييييييير و فيتامينات و بروتينات وحاجات مفيدة

ال 8 كبايات ماية حلوين لبشرتك وشعرك
البروتينات كلها مهمة للشعر عشان شعرك ده عبارة عن بروتين أصلا
كتري من الفراخ واللحوم بشكل عام والسمك والجبنة
الجرجير ده أسطورة أصلا للشعر كتري منه
البيض مفيد اووووووووووووي عشان مليان بروتين بس ده بلاش تكتري منه عشان الكوليسترول, يعني 3 بيضات ف الأسبوع حلوين
الحدييييييييييييييييد ثم الحديد ثم الحديد
لو عندك انيميا اجري وعالجيها بسرعة
*****************************
بالنسبة للفيتامينات ف الزنك تحححححححححفة لتطويل الشعر
في كبسولات سترس تابس بالزنك ب 20 جنيه العلبة و فيها 20 حباية

و في فيتا زنك ب 5 جنيه الازازة و فيها 30 حباية

اختاري حاجة فيهم
دي تتاخد كل يوم بعد الغدا لمدة 3 شهور وبعدين توقفيها 3 شهور وترجعيلها تاني
بجد تجنن أنا شعري طول عليهم جداااااااااااااااااااااا

- بالنسبة بقى للبانتوجار

بصوا هو جميل , الدكتور كان كتبلي عليه وانا كنت خايفة أجيبه بس جربته من فترة , بيشتغل كويس وبيقلل التساقط جداااا و بيتقل الشعر
مشكلته هتبقى انه بيتقل شعر الوش شوية, يعني هتحتاجي تعملي وشك كل 4 أيام مثلا, و طبعا الموضوع بيختلف من بنت للتانية, في بنات بيزودلهم شعر جسمهم و بنات بيزودلهم وشهم وبنات الاتنين وبنات مش بيحصلهم حاجة, يعني انتي ونصيبك
وطبعا الكورس بتاعه 3 شهور, بلاش تاخديه من نفسك شهر واحد وتوقفيه فجأة وتصوتي وتقولي شعري كله وقع
و خلال اخر شهر الجرعة بتتقلل بالتدريج, يعني لو بتاخدي حبايتين ف اليوم يبقى ف اخر شهر تاخدي حباية واحدة ف اليوم اول 10 ايام, وتاني 10 ايام تخليهم حباية يوم ورا يوم, واخر 10 ايام يبقوا حباية كل 3 ايام مثلا وبعدين توقفيه
لازم بالتدريج

- أقراص الخميرة ( عبارة عن فيتامين B )

مفيدة جدا للبشرة والشعر و بتخلي الشعر صحته جامدة و بتطوله
انتوا بتخافوا منها عشان ناس بتحس انها بتطخن وناس بتحس انها بتخسس
اللي فهمته انها بتتاخد قبل الأكل بساعتين لو عايزة تخسي و بعديه بساعتين لو عايزة تطخني
انا عموما كنت باخدها قبل الأكل و متخنطش ولا خسيت

في ناس بتطلعلها حبوب ف وشها وناس بتصفيلها بشرتها
والله انا بالنسبة لي حسيت ان بشرتي بقت أصفى عليها
ف انتي ونصيبك برضه

****************************

نتكلم ف الشامبوهات

لو عندك قشرة ف شعرك لازم تتعالج قبل أي حاجة, القشرة سبب كبير جدا جدا لتساقط الشعر
لان بيبقى في فطريات وحاجات مش لطيفة
احسن حاجة للموضوع ده هو شامبو نيزابكس (17 جنيه )

تهتمي بالفروة جدا وانتي بتغسلي بيه مش الأطراف
و تدلكيه في الفروة كويس و تسيبيه 3 او 4 دقايق بعدين تغسليه
دلوقتي انتي المفروض بتغسلي شعرك مرتين بس ف الأسبوع واوعي تكتري عن كده
هتيجي لمدة شهر تغسلي شعرك بالشامبو ده, يعني تقريبا 8 مرات مرتين كل اسبوع
وبعدين بما ان القشرة مرض مزمن, هتحتاجي تستخدمي الشامبو ده بعد كده كل اسبوعين مرة
يعني ايه
يعني انتي قررتي تعالجي القشرة
هتروحي تشتري الشامبو ده, تقضي شهر كامل تستخدميه كل ما تغسلي شعرك, هتلاقي نفسك استخدمتيه 8 مرات لو بتغسلي شعرك مرتين ف الاسبوع
هتوقفيه بعد ما الشهر يخلص و تبدأي تستخدمي الشامبو اللي يريحك
بس هتيجي كل اسبوعين و تستخدميه مرة عشان تحمي نفسك من ان القشرة ترجع

- طيب عالجتي القشرة و الشهر خلص, تستخدمي ايه
شامبو أكرينال حلو جدا جدا جدا جدا للتساقط, هو غالي شوية بس ممتاز (العبوة الصغيرة 80 جنيه والكبيرة 120 تقريبا)

مشكلة الشامبوهين دول انهم بينشفوا الشعر ف لازم بعديهم بلسم او حمام كريم
أحسن بلسم جربته هو جليس الأسود (كان ب 28 جنيه باين)

تحفة و ريحته حلوة
ده بقى عكس الشامبو, تهتمي بالشعر ذات نفسه مش بالفروة
متحطيهوش على الفروة خالص, على الشعر بس
سيبيه شوية برضه كام دقيقة كده واشطفيه بالماية بس

عموما بلاش استخدام البلسم كتير, يعني هتستخدميه طول فترة علاج القشرة بشامبو نيزابكس
بعد كده تستخدميه كل اسبوع مرة او كل اسبوعين مرة

*********************************

السيرم بقى
طبعا لا غنى عن السيرم لانه مهم للشعر جدااااااااااااااااااااااااااااااا
في ناس مش عارفة ايه السيرم أصلا
بصي ده حاجة كده زي الزيت بس أخف بكتيييييييييييييييييييييير
بينعم ويطري ويقلل الهيشان ويغذي الشعر , يعني اوعي تبقي قاعدة دلوقتي ومفيش سيرم على سراحتك
ده بقى اللي هيخلي شعرك الهايش الناشف ده يروح مع السلامة
وأفضل اتنين جربتهم هما ليندو وتريس

الاتنين أحسن من بعض, يعني تجيبي واحد ولما يخلص تدخلي على التاني
وهيعيشوا معاكي كتير كل واحد هيعد ييجي 3 شهور, حسب طول شعرك وكثافته بقى

بعد ما تطلعي من الشاور بتاعك استني لما شعرك يبقى مندي كده و رشي على ايديكي 3 رشات ولا حاجة من السيرم ده و امسحي شعرك بيهم
وزيه زي البلسم بيتحط على الشعر مش على الفروة

************************************

-اشتري مشط خشب محترم سرحي بيه شعرك, وشعرك يتسرح من تحت لفوق مش من فوق لتحت وانتي بتسلكيه, بعد كده امشي من فوق لتحت براحتك

- امنعي السشوار والبيبي ليس والصبغة تماما الفترة دي لحد ما شعرك حالته تبقى محترمة, بعد كده حاولي تستخدميهم ف المناسبات وبس, لما تستخدميهم كل يوم شعرك بيموت كل يوم

- شوفي هتغسلي شعرك انهي يومين ف الأسبوع و ف اليومين دول تعملي حمام زيت لشعرك , أحسن زيوت هي الخروع والخردل و الجرجير و السمسم وجوز الهند
اخلطيهم مع بعض ولو عندك ميكروويف حطيهم 10 ثواني كده بحيث يبقوا دافيين
دول بقى اعملي بيهم ماساج لشعرك 5 دقايق و اهتمي بالفروة جدا و بالشعر كمان يعني حطي على راسك كلها
وبعدين لفي شعرك بأي بونيه و سيبيهم لمدة 4 ساعات على الأقل وبعدين تغسليهم

- انسي الماية السخنة لشعرك دي مصيبة سوددددددة, بتبهدل الشعر وتوقعه وتنشفه, و الماية الساقعة كمان انسيها عشان بتجيب قشرة بالهبل
تغسلي شعرك بماية فااااااااااااااااااااااااترة

- اوعي تغسلي شعرك وتقومي زي الشاطرة تعمليه كحكة قبل ما ينشف وتجي تلبسي الطرحة وتنزلي
دي كارثة يا جماعة بلاش الاهمال ده
استني لما شعرك ينشف او متغسليهوش وانتي عاملة حسابك انك تخرجي أصلا

- طبعا مش هوصيكوا, طرحة واحدة وبندانة واحدة لا غير, و لازم بندانة قطن قبل الطرحة

- سيبي شعرك, خليه يعيش شوية و يتهوى بلاش الكتمة ال 24 ساعة