اعرفى نوع شعرك وطريقه علاجه والعناية به

مسامات الشعر porosity بتعتمد على الكوتيكل cuticle وهى الطبقه الخارجيه الواقيه للشعره من عوامل الضرر ايا كانت





وهى في الغالب بتكون سليمه وصحيه واحنا اللى بنضرها ونبوظها وانا هقول ايه اللى بيضرها وبيدمرها



فوايد معرفة انواع مسامات الشعر



مهمه جدااا لان هى اللى بتحدد ايه اللى المفروض تستخدميه لشعرك عشان يبقى صحى وناعم مش نوع شعرك هو اللى بيحدد زى ما ناس كتير اوى بتعتقد

مسامات شعرك هى اللى بتحدد كميه ونوع الترطيب اللى شعرك بيحتاجه


ازاى تعرفى نوع مسامات شعرك



- الاختبار الاول


هاتى كوبايه ميه وخصله من شعرك تكون مغسوله بشامبو ومش عليها اى زيت او كريم وحطيها في الكوبايه

لو الشعره عامت على وش الميه يبقى انتى مسامات شعرك ( منخفضه او ضيقه )

لو الشعره نزلت لقاع الكوبايه تحت يبقى مسامات شعرك ( مرتفعه او واسعه )

لو الشعرة بقت في النص (عاديه )







- الاختبار الثانى



هاتى خصله من شعرك وبليها بالميه لو اتبلت بسرعه يبقى شعرك مساماته (واسعه او مرتفعه)

لو ما اتبلتش اوى يبقى (عاديه )

لو خدت وقت كبير عشان تتبل يبقى ( منخفضه او ضيقه)









طبعا الشعر بتاخد مغسول بشامبو مش عليه اى مرطبات من المشط او الفرشاه مش بتشدبه يعنى









طيب يعنى ايه الكلام ده :



مسامات الشعر porosity



هى قدرة الشعره على امتصاص واستقبال الميه والمغذيات والمرطبات ومنتجات الشعر المختلفه

وبتنقسم ل ( عاديه ، منخفضه ،مرتفعه)




مسامات الشعر المنخفضه او الضيقه low porosity



معناها ان الكوتيكل او الطبقه الخارجيه للشعره صحيه ومغلقه حتى انها بتستقبل المرطبات والمغذيات بصعوبه وده مش معناها ان الشعر مش صحى بس معناها ان الشعر بيحتاج مززززيد من الترطيب الصحيح

وبكده بتلاقى ان الكريم او الزيت او اى حاجه بتحطيها على شعرك بتحسى انها لسه على شعرك من برا وممكن تحسيه ملزق شويه لانهم بيفضلوا موجودين على وش الشعره

وهتلاقى ان نوع الشعر ده بيبقى فىالغالب جاف وناشف على طول وده اللى بيخليها تعوم على وش الميه لانها مسمحتش للميه باختراق جدارها وبالتالى مش بتسمح لاى مرطبات بالدخول لجو الشعره بسهوله

ونوع الشعر ده مش بيتصبغ بسهوله حتى الكوافيرات بتقول عليه (شعر مقاوم للصبغه) مش بيتصبغ بسهوله خاالص

بس فيه ميزة في نوع الشعر ده انه اول ما تقدرى تدخلى المرطبات لجوه الشعره هيفضل الشعر محتفظ بترطيبه لفتره كبيرة وغالبا الشعر ده بنشوفه جاف جداا



افضل طريقه للترطيب


بيحتاج مرطبات خفيفه زى زيت خفيف (ارجان ، جوجوبا، جوزهند ) او بديل الزيت او الليف ان كونديشنر واللى بيكون في الغالب هى وبديل الزيت داخلهم ميه aqua

لان هى دى اللى تقدر تخترق جدار الشعره بسهوله شويه وترطبها من جوه وبره من غير ما تخلى الشعر مزيت او ملزق





مسامات الشعر المرتفعه او الواسعه high porosity



معناها ان الكوتيكل او الطبقه الخارجيه للشعره مفتوحه وواسعه جدا high porosity ودى حاجه سيئه جدا لانها بتكون معرضه لكل انواع الضرر اللى ممكن تتخيلوه والنوع ده بتستقبل المرطبات والمغذيات بسهوله جدا وبتفقدها بسهوله جدااا عامله زى حاجه مخرومه انتى بتحطى من هنا وهو بيطير من الناحيه التانيه وده معناها ان الشعر مش صحى خالص

وبكده بتلاقى ان الكريم او الزيت او اى حاجه بتحطيها على شعرك بتحسى ان شعرك مترطب وحلو وبعد شويه تلاقيه ناشف وجاف ومقطع

وهتلاقى ان نوع الشعر ده بيبقى فى الغالب برضه جاف وناشف على طول وده اللى بيخلي الشعره تمتص كل الميه وتنزل لقاع الكوبايه لان المسامات واسعه جداا فبتسمح للميه باختراق جدارها بس عشان هى مخرومه فهى هتفقدهم بسرعه برضه

ونوع الشعر ده بيتصبغ بسهوله



افضل طريقه للترطيب


بيفقد الترطيب بسرعه كبيرة عشان كده بيحتاج مرطبات تقيله شويه زى ( بديل الزيت او الليف ان كونديشنر + زبده شيا ) او ( ميه + زيت + كريم )

لان هى دى الطريقه اللى تقدر تخلى الشعر يحتفظ بالترطيب جوه الشعر لاطول فترة ممكنه وغالبا الشعر بيحتاج يترطب مرة او مرتين ف اليوم



مسامات الشعر العاديه او المتوسطه normal porosity



معناها ان الشعر صحى بدرجه معقوله وان المسامات بتفتح للمغذيات بدرجه معقوله وبتقدر تحتفظ بالترطيب لفترة كويسه والشعر ده هو الشعر الصحى اللى غابا بنلاقيه ناعم او متوسط النعومه ولا ملزق ولا ناشف حاحه كده بين البينين



وده شكل بيوضح الفرق بين الانواع التلاته







افضل طريقه للترطيب


بيحتاج مرطبات خفيفه زى زيت خفيف (ارجان ، جوجوبا، جوزهند ) او بديل الزيت او الليف ان كونديشنر واللى بيكون في الغالب هى وبديل الزيت داخلهم ميه aqua

وممكن تستخدمى المرطبات التقيله زى زيت الخروع مخفف كدهان او الزبده بس مرة كل اسبوع



طيب عرفنا يعنى ايه مسامات وحددنا نوع شعرنا طيب ايه الحل او العلاج او الطريقه المناسبه لكل نوع شعر




الشعر اللى مساماته واسعه high



ده افضل مثال ليه هو (الشعر المتضرر المتهالك) اللى رايحه جايه تصبغ وتفرد باى نوع من انواع الفرد واللى بتستخدم السيشوار والبيبى ليس كتير جداااا

- سوء التسريح واستخدام فرش الشعر المعفنه ههههههههه اللى بتشده مش بتسرحه .

- كثرة التعرض للشمس

- فرد الشعر المستمر والصبغ المستمر.

- الستخدام المستمر للشامبوهات اللى بتحتوى على سلفات الصوديوم او الامينو لوريال سلفات

sodium lauryl ,ammonium lauryl sulfate shampoos





العلاج



ماسكات البروتين لانها بتساعد على تلزيق مسامات الشعر هههههه بحيث انها تعمل بلوك او حاجز بينها وبين اى نوع من انواع الضرر وكمان بتحافظ على مظهرها العام وبتعالجها من الداخل بس بياخد وقت كبير شويه

واشهرها



- ماسك البيض





- ماسك الافوكادو





-ماسك حليب جوزالهند





-ماسك المايونيز





-استخدام الزبده زى زبده الشيا وهى الوحيده اللى شبه متوفرة في مصر وفى غيرها بس مش متوفر زى زبده الكاكاو وزبده المانجو ودى بانها بتتحط فبتحفظ الترطيب جوه الشعر

الشعر اللى مساماته ضيقه او مغلقه low



وده افضل مثال ليه هو الشعر الجاف جدااا والشعر الافريقى والشعر الفيرجين اللى متعرضش لصبغه او فرد او اى حاجه خالص وبيكون غالبا وراثى واوقات بيسببه تراكم المنتجات على الشعر مش اكتر من كدا





العلاج



- وضع الجليسرين مع كريم او زيت الشعر

-تجنب الزيت الكتير على الشعر

- خلط بيكربونات الصوديوم مع الشامبو مرة في الشهر .

استخدام البخار او الحرارة الخفيفه على الشعر بعد وضع حمام كريم او كريم او زيت على الشعر او حمام زيت لان البخار بيساعد على فتح مسامات الشعر وبالتالى امتصاص الشعر للمغذيات

وممكن تستخدمى كيس بلاستيك بعد وضع الكريم او الزيت او اى مرطبات على الشعر لمده نصف ساعه وبعدين تشيليه بس كده

اى مرطب يتحط على الشعر يكون الشعر مندى مش مبلول .

-حمامات الكريم المرطبه جداا اللى بتكون بالشوكلاته او زيت الارجان او زبده الشيا





مسامات الشعر المتوسطه او العاديه normal



هو افضل مثال ليه (الشعر العادى متوسط النعومه ) ممكن يكون اتصبغ مرة او اتفرد مرة وبتستخدمى سيشوار او بيبى ليس كل مده



العلاج



- عمل حمام كريم مرطب جدااا ومكثف للشعر باستمرار

- تجني صبغه او فرده عشان ميتضررش

- تجنبى الكوى المستمر يعنى يكون على فترات متباعده





طيب برضه عايزين نفهم ليه لما بنعمل ماسك البيض بالذات اللى كثر القيل والقال عليه في المنتدى ناس تقول ده بيخلى الشعر حرير وناس تقول ده اكتر حاجه خلته زى اتش دبور ههههههههه



التفسير : ان ماسكات البروتين بتيجى بتملى الفراغات الموجوده جوه الشعره زى ما قولنا طيب تمام ايه المشكله ؟؟ لما بتملى فراغات للشعر المتضرر اللى مساماته واسعه ده بيخلى الشعره ماسكه نفسها تحتفظ بالترطيب بتملى الاخرام الموجوده للشعره بتحسن الشعره جداا

طيب لما ماسك البيض يتحط لشعر مساماته ضيقه هيملا الفراغات الموجوده في المسامات الضيقه دى وهيعمل زى بلوك او مانع او حاجز كده فبالتالى بتلاقى شعرك ناااااااااشف جداا ومش بيتسقبل ولا زيت ولا كريم ولا اى حاجه اطلاقا وده لانك سديتى الباب اللى كان بيدخله منه المغذيات والمرطبات لكن للشعر المتضرر انتى خليتيه يمسك نفسه ويتلم هههههههه ويستقبل المرطبات ويحتفظ بيها مش يبقى زى الخرم ويطيرها على طول


اللى زيه هو المايونيز والصبار والافوكادو وحليب جوزالهند


بس الافوكادو وحليب جوزالهند لو اتعادلو بزيوت هتلاقيهم بيعالجوا وبيرطبوا الشعر جدااااااااااااااا



اوقات بنفتكر شعرنا متضرر ومتهالك مع انه ناشف ومتقصف طيب ايه المشكله ؟


المشكله ان في فرق كبير جداا الشعر الناشف والمقصف عايز ترطيب

الشعر المتضرر المتهالك عايز علاج وحاجه تقويه

في فرق عشان كده منتجات الشعر بتكون للشعر الجاف غير المتضرر انتى لو جبتى حمام كريم مثلا للشعر المتضرر وحطيتيه هينشف شعرك جداا لو انتى شعرك جاف بس مش متضرر لانه هيكون في نسبه بروتين عاليه جداا انتى مش محتاجاها لانها ببساطه هتسد اى ثغرات في شعرك اللى شعرك بيتغذى منها

منقول