الكيكة الاسفنجية السهلة للمبتدئات بالصور

المقادير

3 كوب دقيق منخول- كوب ونصف لبن – كوب ونصف سكر أبيض ناعم - ا/3 كوب زيت – 5 بيضات ( بيض بلدى بيكون حجمه صغير لأن الفراخ بتاعتنا عاملة رجيم لكن لو البيض شارياه من بره بعمل 4 بس) – كيس بكينج بودر – كيس فروتى برتقال مركز ( الصغيرال بـ 50 قرش ) أو بودرة كاكاو– 2 كيس فانيليا

الطريقة

ننخل الدقيق فى وعاء ونضيف عليه البكينج بودر ونقلبه مع رفع اليد لأعلى حتى يتخلله الهواء وبعدين نسيبه على جنب علشان نحضر الخليط فى الخلاط.

نضع اللبن والبيض والزيت فى الخلاط وأضربه ضربة خفيفة وبعدين أضيف السكر نصف كوباية بنصف كوباية علشان الخلاط ميتحرقش بعيد الشر .. ونضيف كيس الفروتى ونشغل الخلاط ونضرب الخليط ضربا مبرحا .. مش مبرحا أوى يعنى دقيقتين كده.

نصب الخليط السائل فى وعاء ثم نضيف عليه الفانيليا

نشعل الفرن ليسخن.

وبعدين نحضر الصينية ال هنعمل فيها الكيكة .ندهنها بالزيت ونرش عليه دقيق ونسيبها على جنب.

نبدأ نضيف الدقيق على الخليط السائل على فترات يعنى شوية ونقلب لحد ميختفى ونضيف شوية كمان لحد الدقيق ميخلص بس أهمحاجة نقلب فى اتجاه واحد ونرفع ايدينا لفوق واحنا بنقلب علشان يدخل هوا جواها وتكون اسفنجية زى ماحنا عاوزين.

وبعد منخلص تقليب هنلاحظ ان الخليط بأه متجانس كدا وقوامه حلو مش متقطع .. زى الصورة شوفوا بقت عاملة ازاى بعد التقليب المستمر فى اتجاه واحد

لو عاوزة تعملى الكيكة خليط من نكهة البرتقال والشيكولاتة .. وانتى بتخلطيها فى الخلاط بلاش تضيفى كيس الفروتى واسكبى الخليط فى طبقين واحد اخلطى معاه الفروتى والتانى اخلطى معاه بودرة الكاكاو وضيفى دقيق عادى لكل خليط منهم لحد مينسجم تمام وانتى بتصبيه فى الصينية حطى ملعقتين من الخليط بالبرتقال وملعقتين فوقهم من الكاكاو لحد مالكمية كلها تخلص هتلاقى شكل الكيكة جميل خطوط كدا صفرا فى بنى وهاتى ملعقة وخططى الصينية من النصف بالشكل ال فى الصور دا .. أنا عملت الكيكة المرة دى فى قالب بس لو فى صينية مدورة هيكون شكلها أحلى كتير ..

شايفين فقاقيع الهوا ال جواها .. دى ال بتخليها تترفع وتبأى اسفنجية

آخر خطوة هى الخبز .. علشان الكيكة تستوى من جوه متحمرش بس لازم تحطيها على صاجة الفرن فى نصف الفرن على نار هادئة ومتفتحيش عليها قبل ماريحتها تطلع يعنى تقربا بعد نصف ساعة وخمس دقايق تطلعيها على السلك وتشغلى الشواية يدوب وشها يحمر وتخرجيها من الفرن وتسيبيها تبرد وبعدين تقطعيها .. ودا شكلها النهائى