سمان محشى ورز بالكبد والقوانص

نبدأ باسم الله
ده سمان متنضف وانا نقعته في ميه وخل وملح عشان الزفاره

طيب ايه الابيض ده مش دقيق لا دي معلقه نشا مهلبيه سمعت طباخه هنديه بتقول ان النشا بيسرع الطهي وهي بتحط معلقه نشا في اي تتبيله سواء للشوي اوشاورما عشان تستوي اسرع وان جربتها فعلا بجد وكمان مره حطيت معلقه نشا مع اللوبيا وهي بتتسلق فعلا اتسلقت اسرع وبعدين شطفتها وطبختها عااااااااادي
هانجيب بصله تمام ونقطعها صغير وكبده فراخ انا استخدمت طبق 400 جرام ونقطعها صغير وتوابل طبعا اللي تحبيها الملح في الااااااخر خااالص ومعلقه توم مفروم ومعلقه ذبده ومعلقه زيت وع النااااار ملحوظه الكبده تتغسل قبل التقطيع بماء وخل مش بعده

نقلب كويس شويه وبعدين ننزل بكوب رز عليهم ونقلب

وبعدين نضيف ميه الرز والملح ونغطي اول ما الرز يشرب ميته وخلاص هاهدي الناار عليه واسيبه يترددد اخد جزء منه عشان احشي بيه السمان اللي لسه منقوووع في الميه ونكمل سوي باقي الرز عاادي يتقدم جنبه ممكن تضيفي طماطم مبشوره او معلقه صلصه لو عاوزه للرز اللي هاتحشي بيه السمان وممكن كمان تضيفي عودين شبت لوعندك بس الاساسي الكبده
هانغسل السمان ونشطفه ونطلعه في مصفي ونبدأ نحشي بسم الله انا هاحشي من تحت بس
الاول ادخل صباعي اوصل لحد الرقبه عشان ياخد اكبر كميه رز

طيب ندخل الرز براحه ومعاه قطع الكبده طبعا واكون حريصه مايكونش كتير عشان مايفرقعش في الميه وفي الاخر اسد الفتحه بقطعه كبده عشان الرز ما يخرجش وهكذا لما نخلص

ده زنجبيل طازه قطع يا جماعه انا بقطعه طرنشات كده عشان يكون سهل اطلعه قبل التقديم وبحطه في اي شربه لانه مفيد جدا وطعمه زي الليمون تقريبا ولو مش عندك طازه ممكن تبشريه وتتحتفظي بيه في الفريزر

تكون فيه حله ع النار فيها ميه بتغلي والزنجبيل ونسقط فيها السمان ونظبط ملح ولما يستوي اطلعه في مصفي عشان احمره طيب اعرف ازاي انه استوي بالشوكه واشد نسيره صغيره من غير ما ابوظ الشكل واشوفها استوت ولا لا بجد اخد معايا نصف ساعه فقط ع النار وكان تمام بالنسبه للتحمير اي حاجه بط فراخ سمان انا بفضل اني ادهن بالفرشه سمنه وادخل تحت الشوايه كده صحي وخفيف وكمان بيحافظ ع الشكل مظبوط مش بيتبهدل خصوصا لو الحاجه استوت زياده شويه بدل ما تحمريه في سمنه وتفضلي تقلبي وكمان لتقليل اصابات المطبخ

وده بعد ما بقي جااااااهز

كمان واحده للإثاره

ياخبر احنا نسينا الرز ولا ايه لا يكون اتحرق اجري يا فتوكه منك ليها بسرعه
لا ودي تيجي برضوا

اتفضلوا معانا السمان المحشي وبنفس الطريقه بعمل الحمام بيكون تحفه

وكمان الرز بالكبده يارب يعجبكم



منقول