ازاى تنظمى نوم رضيعك بدون تعب

السلام عليكم يا احلي امهات..

طبعا كل اللي والدين جديد ..او حتي فيه مش جديد بيعانوا من حكاية نوم ابنهم و رضاعته الغير منتظمة
أنا(واعوذ بالله من كلمة انا) الحمد لله...بفضل الله قدرت انظم نوم بنتي و رضاعتها لما تمت شهرين و هيا دلوقتي بدأت في الخامس..و ماشيين علي نفس النظام...طبعا كل يوم بشكر ربنا علي النعمة دي و بتمني تفضل كدة
أحب اقول اني كنت في الاول مش مصدقة ان ممكن نمشي البيبي علي مزاجنا سواء ف النوم او الرضاعة..و كمان اول بيبي ليا و كانت تصعب عليا اني اعملها نظام و كدة

بس بعد ماربنا وفقني لقيت ان كدة افضل ليها و لصحتهاو كمان وزنها

اولا:
استعنت بالله و بقيت ادعي كتير وواظبت علي صلاة الفجر(و الفضل يرجع لبنوتي عشان هيا مكانتش بتنام غير بعد الفجر)
ثانيا:
جبت دوا للانتفاخات ممتاز ..نقط بيبي ريست ..هيا 3 مرات في اليوم قبل الرضاعة
ثالثا:
_انا مثلا بنتي صحيت 12 الظهر..ترضعيها في الضلمة(علي ضوء خافت)عشان ترضع كويس...هترضع من 5 الي 10 دقايق
خليها بقي صاحية ما بين 1.5 الي 2 ساعة...طبعا الاول ابتدي بساعة او ساعة و نص و لما تلاقيها كام يوم اتعودت زوديها لساعتين
_بعد ما يعدي الساعتين ترضعي تاني كويس و تحطيها تنام حتي لو هيا مفتحة و صاحية...
_لو زمزأت بسيط طنشيها و هيا هتنام...انما لو عيطت ..روحيلها شيليها ف حضن و هديها و حطيها تاني..حتي لو عملت كدة 3 او اربع مرات
_هتنام من ساعة و نص لساعتين
_افضلي اعملي كدة من الصبح لغاية الساعة تسعة كدة:من تسعة لاتناشر او واحدة...هترضعيها و تكرعيها و تطلعيها في النور و تفضلي تلاعبيها
_هتيجي بقي علي 12 او واحدة..علي حسب نظامك طول اليوم...هتغيريلها و ترضعيها..و تحطيها تنام...ولو عيطت برضو زي ماقلنا قبل كدة تطنشي شوية مش كتير و تدخليلها ...كذا مرة علي ماتنيم نفسها
_بس و هتصحي بقي بعد 3 او اربع ساعات عشان هيا هتكون تعبت...ترضعيها و تحطيها ...و هكذا لغااااااااية 12 او واحدة الظهر تاني يوم

ملحوظات مهمة:
1-لازم اعصابك تكون هااااادية جداااا و تكوني صبورة و حنينة
2-لازم تهتمي بأكلك جداا المشروبات خصوصا بالليل عشان لبنك يبقي مش قليل و يشبعها و تنام كويس
3-لو بنتك بتنام علي بطنها و مش بتحط وشها في المرتبة...هترضعيها و تحطيها من غير تكريع...هيا هتكرع نفسها
انما لو بتنام علي ضهرها عادي...لازم تكرعيها الاول
4-هتاخدي حوالي اسبوع علي ماتعرفي تظبطي النظام ده...لو الطفل مشقلب نومه اوي و بينام طول النهار...لو عيط بالليل جامد...يبقي عايز يلعب و مش عايز ينام...تلاعبيه بس تحاولي بعدها بساعتين تنيميه
5-لازم توفريله حجرة هااااادية و تهويتها كويسة مع اضاءة ضعيفة عشان يعرف ان ده مكان ووقت النوم
6-الفكرة بتعتمد انك تصحيه عدد ساعات اكتر بالنهار ومن 9 ل 12 بالليل فيكون تعباااان و ينام طول الليل كويس...يدوب يصحي يرضع و هوا مغمض و يكمل نوم تاني
7-_تنظيم الرضاعة هوا اللي هيساعدك علي تنظيم النوم...مش كل ما الطفل يزن يبقي جعان...و مش كل نص ساعة تديله...كدة هتجبيله غازات و تتعبيه
*عايزة اقولكم ان طبعا حياتي اتظبطت كتييييييير عن الاول
*بعد مابنيمها 12 او واحدة...بقوم اطبخ و اروق في الشقة لغاية 4 الفجر...بعدين انام و اصحي 12 او 1 الظهر معاها...و طبيخي جاهز و مرتاحة ..
الحمد لله...ادعولي ان ربنا يديمها عليا نعمة و يهديهالي
*انا عمري ماقولت علي موضوع ليا قيموه...بس بجد الموضوع ده نفسي امهات كتير تستفاد منه عشان كتير بشوفهم يشتكوا من الموضوع ده و بيصعبوا عليا عشان انا مجربة...و كنت من فترة كبيرة بشتكي و بقولكم ان بنتي عياط طول الليل و زن و اني تعبانة...و انتوا اللي دعيتولي فا لما ربنا قدرني احل المشكلة دي حبيت اشكركم و افيدكم

منقول من فتكات