افكار حلوة هتسهل عليكي فى مطبخك

حبيباتى اسمحولى اقدملكم 10 افكار للمطبخ
ويارب تستفيدوا منها


1- خلى دايما عندك فى التلاجة شربات جاهز للحلويات اعمليه واحفظيه فى برطمانات نضيفة وتاخدى منها حسب الطلب




2-شيلى فى الفريزر كام كيس عصير طماطم ينفعوا وقت الزنقة وخصوصا لو الكهربا مقطوعة كالعادة

2-اى طماطم تتوفر عندك خصوصا وهى رخيصة اغسليها ونضفيها وشيليها فى الفريزر بتنفع وقت الزنقات والعزومات



4- لسهولة تقشير التوم انقعيه فى شوية مية لمدة ربع ساعة هيتقشر بكل سهولة


5- لتحمير اللحوم المسلوقة بطريقة جديدة وصحية ابشرى واحدة طماطم وشوية فلفل اسود وبهارات لحمة وكبشة شوربة واغليهم مع اللحمة المسلوقة على البوتجاز غلوتين وبعدين دخليها الفرن 5دقايق تحت الشواية ودوقى الذ واخف لحمة محمرة









6- ونفس الخطوات اعمليها مع لحمة الفراخ المسلوقة بس تقطعيها الاول


7- لو عندك شوربة بط او وز هتلاقى على وشها طبقة سمنة كتيرة شيليها بالمعلقة فى طبق وحطيها فى التلاجة
وحطى منها معلقة على المحاشى بتديها طعم وريحة جميلة (لو طولت عندك احفظيها فى الفريزر احسن تبوظ)

شوفى شكلها ولا السمنة البلدى وطبعا هى افضل كتير واقل ضررا من السمن النباتى المهدرج


8-لما تعملى كباب فى البيت افرشى تحته حبتين بطاطس متقطعة طرنشات رقيقة هتشرب من اللحمة وتكون افضل كتير من الشيبسى الجاهز





9- لتجنب فوران اللبن حطى معلقة الشاى او اى معلقة معدن فى قعر الحلة ومعلقة خشب فوق الحلة بالشكل ده (بتمتص الحرارة الزيادة وتخلى اللبن ياخد كفايته من الغليان بدون فوران) بس اوعى تسيبه وتخرجى من المطبخ وتعتمدى على المعلقة
المعلقة بتهدى الحرارة شوية وتخليكى تقدرى تقلبى فيه براحتك من غير مايفور منك

10- لو عاوزة تعملى حاجة سريعة جنب الاكل ومفيش طماطم هاتى 2حبة بطاطس وقطعيها طرنشان رقيقة وعليها بصلة حلقات رفيعة ومعلقة سمن وفلفل وملح ورشة مية صغيرة واغليها على البوتجاز غلوة ودخليها الفرن وبعد 10 دقايق دوقى احلى صنية بطاطس بيضا


منقول من فتكات