اختى المريضه.. هونى على نفسك ونضفى بمجهود اقل

انا بكتب الموضوع دا طبعا لاى اخت حابه تستفيد


ولكن بالاخص لاى اخت مريضه وعندها تعب سواء فالظهر او الرجل او اى مشكله صحيه او حتى حامل
لان انا اكتر واحده حاسه بكل اخت مريضه وعندها حاجه تعبها


لان انا تعبانه برضه وعندى مشكله صحيه مزمنه فقولت اكيد فى بنات زى برضه فحاولت اجمع اى حاجه بعملها وهتفدكم او حتى لو فى منكم عارفها فبقول يمكن فى مش عارفها

نقول بسم الله الاول ونبداء






1.لا تنضفى الحمام وانت واقفه خلى فى مكنسه بايد تحطى الاريال والكربونات والخل وملح الليمون فى ميه وترشيهم على الارض وسيبى الارض ساعه اتنين
وادخلى ادعكى الحمام وانتى واقفه بالمكنسه وبعدين كوبى ميه نضيفه وامسحى بالمساحه وفالاخر نشفى بالشرشوبه كل دا وانت واقفه

2. ارضيه المطبخ بعد متخلصى هاتى مكنسه واكنسى الارض وبعدين لمى الزباله بالجروف وامسحى الارض بالشرشوبه بعد الكنيس يدوب هيبقى تلميع وبس

3.رخامه المطبخ ممكن لو عليها زباله بفوطه النضافه بتاعه المطبخ لمى الزباله وخلى ايدك التانيه فيها الجروف لمى الزباله فالجروف

4. البوتاجاز لو مش فيكى حيل لنضافته وعاوزه يبقى شكله مقبول لحد الوقت الى يكون فيكى حيل تقدرى تنضفيه لمى الزباله الى عليه بفوطه النضافه ووالجروف فايدك عشان تجمعى الزباله فيه

5. عشان تحافظى على شكل الحيطان جمب الفيش او جمب الاكر بتاعت البيبان بدون تعب
خلى فى بخاخه حطى فيها اريال ورشى رشه وفوطه النظافه فى ايدك التانيه وامسحى
اعملى كده مره كل اسبوعين مثلا عمر مهتشوفى اى وساخه فالامكان دى


6.لو جوزك من هواه شرب الشاى كتير خلى فيه كنكه وياريت الكنكه تكون استلس بلاش الالمونيم وخلى فى صنيه صغيره تعملى الشاى وتحطى الكوبايه على الصنيه بعد ميشرب تروحى تشطفى الصنيه وتركنيها وفى نفس الوقت اشطفى على طول الكنكه وحطيها على الصنيه او علقيها زى متقولى خليها عده الشاى ليه او ممكن تخلى فيه ترمس عندك تغلى الميه وتحطيها فيه كل ميعوز يدوب هتصفى الميه من الترمس فالكوبايه


7. لو المواعين تعباكى فى غسيلها حلها سهل اوى ليفه وحطى كل الاطباق والكوبايات والمعالق فى الحوض بس كونى حاطه مصفه تحتهم عشان اى بقايا اكل متنزلش فالبلاعه وتسد الحوض وبالليفه وافتحى الحنفيه بسرعه لفى ايدك فالطبق عشان تشيلى اى حاجه لازقه فيه وترمى الطبق فى طبق بلاستك كبير شويه مخصص ليها امليه ميه سخنه وصابون وملح لمون او كلور والليفه او السيلك وارمى بقه طبق ورا طبق ورا طبق لحد متخلصى الاطباق وابدائى بقه ادعكى كل الاطباق دى لحد متخلصى دعكهم وابدئى اشطفى
الطريقه دى حلوه جدا هتوفرلك وقت ومجهود ولو انت تعبانه ممكن خلى كرسى زى كريى البارات اقعدى عليه وانت بتعملى كده عشان رجليكى لو تعباكى


8. السجاده لو عاوزه تحافظى عليها من غير متغسليها كتير يبقى شويه ميه واريال وكربونات وخل فى الجردل وشويه داونى عشان الريحه تبقى حلوه وبشرشوبهواعصريها فالجرد ومشى على السجاده اعملى الحكايه دى كل شهر مثلا هتخلى السجاده نضيفه


9. لو مش عاوزه تتعبى فى حط اطباق الاكل وشيلها بعد الاكل على السفره وانت تعبانه ومش عاوزه تروحى وتجى
هاتى صنيه كبيره استلس الى هى صنيه العزومات وخليها عندك فالمطبخ ولما تجى تغرفى الاكل فالاطباق اغرفى كل حاجه وحطيها على الصنيه كلها مره واحده بالمعالق والميه والعيش وطلعيها مره واحده وتخلصوا الاكل وتدخليها مره واحده هتوفر عليكى كام مشوار لحد المطبخ

10. الحمام تقدرى تحافظى على نظافه حيطانه والمريات بدون مجهودكل متجى تاخدى شاور البخار هيملى الحمام خلى فى حسابك فوطه لفيها على المساحه ومشى على حيطان السراميك الى فوق والمريات هيبقى كده المطبخ نضيف على طول


11. قاعده الحمام كل متجى تاخدى شاور بالفرشه بتاعه التواليت وشويه اريال ارميها حولين القاعده ومشى بالفرشه بسرعه وشدى السيفون هتفضل القاعده نضيفه فى اى وقت بدون متتحرجى لو جهه ضيف على فله

12. خلى ديما الاوض والحمام والمطبخ والصاله فيهم سلل زباله عشان تحافظى على الارضيات مكنش عليها زباله يدوب التراب الناعم


13. ولادك لو بيلعبوا او بيحبوا ياكلوا وهما بيلعبوا خلى ديما فى ملايه قديمه عندك خليهم يفرشوها ولما يخلصوا يلموها بالراحه وينفضوها فالبلكونه وحطيها فى درج على طول


14. وفرى على نفسك انك تملى ازايز ميه كتير وهاتى كولمن واميله مره واحده فاليوم
15. المعالق لو تعباكى فالنضافه اغلى هاتى حله وامليها مايه واريال وملح ليمون وعالبوتاجز حطى المعالق معاهم واغليهم عالنار وسبيهم لما يبردوا يدوب بالسلك هيبقى تمام

دى افكار بسيطه هتوفر عليكى شويه تعب وطبعا اكيد فى اخوات كتير عندها الافكار دى واحسن

لكن انا حبيت ان يمكن معلومه صغيره تفيد حد منكم

الموضوع مش منقول من اى مكان دا مجهود شخصى

لان انا تعبانه وحاسه بكل واحده تعبانه فبحاول اعمل اى حاجه باقل مجهود

والحكمه بتقول ما لا يدرك كله لا يترك كله

مينفعش يا اما انضف بكل ما اوتيت من قوه يا اما انام فالخط خالص
من مواضيع
 

همسه حنين 32

فتكات