اسهل تشيز كيك بالصور

المقادير
2 علبة زبادي صغيرة اوعلبة كبيرة

2 بيضة

فانيليا

نص كوب سكر

كوب لبن

واحد ونص علبه بسكوت ساده مطحون

ربع كوبايه سمنه سايحه

كوبايه كاكاو محلى

باكت كريم كرامل


الطريقه بقى يا قمرات


نخلط البسكوت المطحون مع السمنه ونكبسهم كده فى بعض ونحطهم فى الصينيه بتاعتنا



وبعدين ندخله الفرن لمده 10 دقايق يادوب كده يمسك نفسه شويه

وبعدين نخلط البيض والسكر والفانليا

وعليهم الزبادى واللبن



وبعد كده نحط الخليط بتاعنا ده على البسكوت ونحطه فى الفرن تانى



بس المره دى هنسيبه يستوى كده شويه

بس ماتحمريش الوش

اختبريه كده زى الكيكه ..لحد ماتحسى انه استوى ويبقى بالشكل ده



نحط على النار كوبايه الكاكاو بتاعتنا ومعاها باكيت الكريم كرامل

وقالوبتين على الماشى كده

ونحطهم على الوش بتاعنا مباشره لانه بيتجمد بسرعه



ونسيبهم كده يبرده شويه وبعدين نحطهم فى التلاجه لحد مايبرد ويمسك نفسه كويس

وفى الاخر تقلبيه هيبقى بالشكل ده


وده شكله من جوه



ودى حته حلوه عشان اول فتوكه هترد عليه