كريب زى المطاعم بالظبط

النهارده هقولكم وصفه كريب مختلفه عن التقليدي بتطلع زي كريب المحلات بالضبط
طبعا المقادير العاديه كوب لبن + كوب دقيق + 2 بيضه+ ذره ملح
ويضاف زبده اختياري
ده الكريب اللي بستخدمه للكريب الحلو والكانيلوني
بس علشان يطلع زي بتاع المحلات مقرمش
غيرت المقادير

نبدا

كوبين دقيق وكوب لبن وكوب ماء وذره ملح وبيضتين
ويخلط كويس في الخلاط ويصفي ويترك حوالي ساعه

هيكون بالشكل ده
ونبدا بالخطوات
مقلايه تيفال كبيره
ندهنها بالزيت خفيف خالص او مش ندهنها انا ندهن مره اه ومره لا
ونحطها علي النار
ولما تسخن نحط فيها كبشه واحده من دي ونحركها بسرعه علشان تتفرد والمهم تكون رقيقه جدا
ونسيبها علي النار لحد ما الحواف تخلع وتاخد لون
ونقلبها الناحيه التانيه وشويه صغيره نطلعها ونحط اللي بعدها وهكذا

الحشو
ممكن تحشي اي حاجه فراخ بانيه شاورمه متشوحه اوعصاج او شاورما لحم او كبده او جمبري او جبن اي حاجه
انا النهارده استخدمت
سوسيس وعصاج


طبعا خضار وزيتون وجبنه اللي تحبيها انا استخدمت شيدر ممكن موتزريلا او رومي زي ما تحبي

اسيبكم مع الصور لتوضيح الخطوات
انا بفضل طريقه التقفيل دي علشان بتاخد حشو كتير وبتحافظ عليه مش يوقع لو عندك اطفال

وديواحده تانيه حشو العصاج

طريقه لف المحلات بتكون كده مش بتاخد حشو كتير وبتوقع

تطبق فوق علي فاضي الحشو يتحط بعد كده
زي الصوره اللي تحت ويتعمل مثلث زي كده

وبنحط كله في صنيه في الفرن مدهونه بسيط وبتطلع كده وبالهنا والشفا
لو تحبي تخلي لونه ابيض فاتح زي ما هو ويقرمش لفي كل واحده في فويل وخليه في الفرن من فوق

منقول