أفكار مفيدة للتوفير فى الأكل

السلام عليكم ورحمة الله وبركاته
الموضوع للعضوة

ommarwan

فتكات

1_ الحوم والفراخ
بتشترى طلبات الشهر وتقسميها بالقطعه على حسب عدد افراد الاسره
اللحمه مثلا ممكن تعملى لكل فرد قطعه كبيره او قطعتين وسط
الفراخ ممكن تعملى لكل واحد ربع
وتحطيهم بنظام فى الفريزر عشان مايخدوش مكان كبير
كذلك البفتيك والبانيه كله بيتقسم بالقطعه

2_ التوفير فى الخضار للى بيشتروه بالجمله
انا باقسم الخضار بالكوبايه
مثلا البسله يكفينى منها كوبايتين
الباميه كوبايتين ونص
السبانخ كوبايتين
باجهز الخضار كله واغسله واقسمه واحطه فى الفريزر
3_ التوفير فى البصل
لو هتعملى كفته لحمه او فراخ او هتعصجى لحمه هتحتاجى بشر البصل بس بدون الميه بتاعته
(تفل البصل زى ما بيقولوا ) بابشر البصل واعصره واشيل الميه على جنب
احط بشر البصل على الكفته او العصاج
واخد ميه البصل اتبل بيها بفتيك او بانيه او فراخ للشوى او لحمه للشوى
الفكره دى هتوفر لك كتير من وقتك على فكره

4_ اللحمه المفرومه
هاتى كميه تكفيكى للشهر وعصجى جزء منها وشيليه فى علبه فى الفريزر
وقبل ما تعملى صوانى مكرونه او جلاش
او كوسه باللحمه المفرومه او بطاطس بيوريه
طلعى العلبه من الفريزر وخدى منها الكميه اللى تكفى الصنيه بالظبط بالمعلقه
وشيلى العلبه تانى فى الفريزر
5_ سلق اللحمه
لو هتسلقى لحمه اسلقى كميه مع بعض
تكفيكى اكلتين تلاته
خدى الكميه اللى تكفيكى والباقى قسميه فى علب وحطيها فى الفريزر
وبكده هايكون عندك لحمه وشوربه جاهزين تطلعيها فى اى وقت تعملى محشى او فته او صنيه بطاطس
او اى اكل بسهوله طالما اللحمه والشوربه جاهزين
6_باقى خلطه محشى
كتير بيبقى منك خلطه محشى وبتبقى مش عارفه تعملى بيها ايه
انا باحطها فى الكبه وافرمها وتبقى عامله زى العجينه
باحط عليها شويه لحمه مفرومه واقلبها كويس واظبط ملحها
واعملها صوابع واقليها فى الزيت واعملها فى العشا او فى الغدا جنب مكرونه وشويه حجات من الفريزر
كلها طبعا من بواقى الاكل لما احب اقضى يوم كده من غير مصاريف
7_ التوفير فى الرز والمكرونه

حددى المقدار اللى يكفيكى بالكوبايه
وراعى ان فيه اكلات بتحتاج كميه رز اكتر من التانيه زى البسله مثلا
لكن البطاطس مش بتحتاج جنبها رز كتير وطبعا ده بيختلف من اسره للتانيه
المكرونه كمان بنعايرها بالكوبايه لانى بشتريها جمله
وكل واحد بيكفيه كوبايه صغيره وده احسن من لما اخد نص الكيس او تلات اربعه
عشان اعرف احدد الكميه صح
ولازم اسيب فى كيس المكرونه فى الاخر شويه مكرونه وبعدين اجمع شويات المكرونه دول اللى اشكالهم مختلفه
واسلقهم وانا بعمل الكشرى
بيدوه شكل جميل جدا
8_ الحلويات
معظمها بعملها بالزيت بدون سمنه نهائى
حتى البسبوسه والكنافه والكيك
بس باحط فى الشربات فى الاخر بعد مااقفل النار معلقه سمنه بلدى وهى اللى بتعمل الشغل كله
كمان انا باحط بدل الفانيليا حبهان
وده بيدى ريحه مميزه جدا للشربات
9_
عودى نفسك تستفيدى من كل حاجه
لو عندك شويه بقدونس او كسبره وقربوا يبوظوا قطعيهم واغسليهم وحطيهم فى الفريزر هتنفعك
لو احتجتى بقدونس لعمل الكفته
قلب الكرنبه مش ترميه
ممكن تقطعيه وتشوحيه مع جزر وبصل وتبقى احلى حشوه للسمبوسه والمعجنات
لو هتطلعى خضار من الفريزر دايما شيلى منه شويه
واهى شويه بسله على جزرايه وكوسايه وشويه فاصوليا وتعملى احلى شوربه خضار او صنيه تورلى فى الفرن